Fritz tubaga ang isyu

Abi ba nako og giisip pa gihapon nga “Niño Bonito” si Kapitan Fritz Herrera diha sa barangay Lorega-San Miguel, dili na man diay.

Nakaagi man gud ko sa Lorega niadtong miaging gabii atul nga nagpulong-pulong atubangan sa barangay hall ang grupo sa mga kandidato nga kontra ni Fritz.

Naminaw ko sa ilang mga atake. Si Fritz maoy nahimong sentro sa ilang atake. Mga higala nako mitug-an nga dili na sila mobotar ni Fritz kay dili na siya mao ang kanhi Fritz nga ilang nailhan. Gilampornas og mga atake si Fritz ug tan-aw nako gihilam-os lang usab sa re-electionist kapitan ang mga pagsaway kaniya.

Wala tingali makaagwanta nga naminaw sa atake, misulod kini sa barangay hall kay sakit-sakit g’yud ang atake sa kauban ra niya sa konseho.

Ang kanhi Fritz Herrera nga kaila nako kaniadto buotan man, apan mora’g nakaingon ko nga nausab tuod da kay dili na gani motubag kun imong kontakon.

Kagahapon sa buntag gipadad-an nako og “text message” si Fritz kay gusto nako siya nga kuhaan og pamahayag sa akusasyon kaniya, apan bisan og gitawag pa nako sa iyang cellphone wala g’yud motubag.

Wala usab siya sa barangay hall dihang mikontak ko.

Gusto lang unta nako nga pangutan-on sa pag-atake kaniya sa iyang mga kaatbang nga bisan og wala magtrabaho ang iyang amahan sa barangay apan giapil man ang ngalan sa mga kawani.

Daghan man gud ang nakasaway kay dunay usa ka “Franklin Herrera Sr.” nga naapil sa mga kawani sa barangay nga gigahinan og sweldo nga P39,238.00 kaniadtong Marso ngadto sa Hunyo 2008.

Ang mga taga Lorega miingon nga wala gayud sila kakita ni Franklin nga Papa ni Fritz nga nagtrabaho sa barangay. Dili ba daku man kini nga isyu?

Gawas pa ana, daghan pa nga isyu ang ilang gibatbat pero dili na lang nako tukion. Kun ingon niana ang batasan ni Fritz nga lisud na kontakon, dili na siya angay’ng himoon pagbalik nga kapitan.

* * *

Abibahan diay nako ang akong mga suod nga higala nga nagpapili pagka konsehal, sama ni Johnrey Saavedra diha sa San Nicolas-Proper, Mario Bitang diha sa barangay Suba, Romy Carreon ug Marlou Solon sa Lorega, Allan Majait sa Apas, Garry Lao sa Tejero, unya pagka Kapitan sama nila ni Ramil Ayuman sa Apas, Liodore “Boy” Miranda sa San Roque ug Manuel Geniston sa Lorega.

Sayud ko nga lisud g’yud ang pagsulod og politika. Bantayi g’yud ninyo karong gabii ngadto na sa kaadlawon kay anaa diha ang “kinamangahay” ug pagpanghulga.

Nahinumdom ko dihang milansar ko pagka konsehal niadtong 2007, diriyot mi makapalag og kumbati kay gigukod namo ang usa sa among kontra uban sa mga tanod nga nanghulga sa among supporters.

Tambag nako sa mga botante nga pilia ninyo ang mga kandidato nga makamao, unya tarung ug may panglantaw nga moserbisyo g’yud sa katawhan.

Hunonga na ang karaan ninyo nga batasan nga mobotar lang tungod kay ang kandidato inyong paryente, suod nga higala bisan og nakahibalo kamo nga sila dili kamao.

Hinoon, duna sa’y makamao nga maantigo usab sa mga binuang. Ayaw na mo anang mga nagpapili nga dili mauwaw mopatrabaho sa ilang mga sakop sa pamilya aron lang g’yud maka-income kay klaro kaayo ang ilang pagkatawo.