Ehemplo sa tinuod nga pag-alagad

Tugoti nga akong dayegon ang Cebu City Assessors Office niining higayona. Nalipay lang ko sa serbisyo sa maong buhatan tungod kay gipakita sa mga kawani niini ang tinud-anay nga serbisyo ngadto sa mga magbubuhis.

Dili ko manlaktud aron inyong masabtan. Niadtong miaging adlaw didto ko sa maong buhatan tungod kay duna koy gihikay nga mga papeles. Sama sa ubang yanong mga magbubuhis nga dunay transaksiyon sa maong opisina, mahigalaon ang ilang pagtagad nako.

Dihang naabot ko sa maong opisina, wala diha ang kawani nga akong tuyo tungod kay matud pa absent sa trabaho. Apan inay nga hinginlan ko ug ingnon nga balik lang ugma sama sa ubang ahensiya sa atong gobyerno, dunay kawani nga nakalimot gani ko pagkuha sa iyang pangalan ang miabi-abi nako.

Nangutana ang maong kawani unsay akong tuyo ug unsay iyang matabang. Dihang ako siya gisulti-an nga duna koy papeles nga gi follow-up iya ning gipangita.

Tungod kay duna pa man koy kinahanglan nga bayran, iya kong giingnan nga mobayad una didto sa City Treasurer’s Office. Human nako og bayad akong gibalik niya ang dokumento ug iya kong gigiyahan kinsay sunod nga duolon aron mahuman ang akong transaksiyon.

Abi ko og siya ray ingon niadto og batasan sa maong buhatan, apan tanang tawo nga giagi-an sa akong dokumento pulos mahigalaon ug sinsiro sa ilang mga trabaho. Lahi sa kasinatian nako sa ubang ahensiya nga kinahanglan kang magpalaban og kusgan nga mga higala aron moirog ang imong papeles.

Sulod sa dul-an sa usa ka oras nga didto ko sa City Assessors Office akong giobserbahan ang lihok sa mga kawani sa maong buhatan. Apan saludo ko nga di lang ang akong transaksiyon maoy paspas kun dili hastang uban.

Dili ko motoo nga gihatagan og ispisyal nga pagtagad ang akong dokumento tungod kay nahadlok sila kay sakop ko sa media tungod kay way usa nilang nakaila nako. Wala sab ko magbandilyo sa akong I.D. aron tuyoon gyud pagpaila ang akong kaugalingon nga sakop sa media.

Kinaiya na gyud tingali sa mga kawani sa maong opisina ang paghatag sa serbisyo nga tinud-anay ngadto sa mga magbubuhis. Busa alang sa City Assessors Office pinangulohan ni city assessor Eustaquio Cesa, akong pagsaludo sa inyong kamatinud-anon sa pag-alagad.

Kamo maoy ehemplo sa tinuod nga pag-alagad sa publiko.

* * *

[email protected]