Haguka
Husto gyud ang pagtuo sa kadaghanan nga dili kontrolado ni Presidente Noynoy Aquino ang sitwasyon atol sa hostage crisis hinungdan nga bisan dili angayang dunay kinabuhi nga makalas, siyam gyud ka mga kinabuhi ang nausik lakip na sa walo ka mga turista.
Nabisto ang dugay nang pagduda sa kadaghanan dihang miatubang si Aquino sa panel interview sa media didto sa Malakanyang niadtong miaging semana. Giangkon ni Aquino nga misalig lang siya sa saad sa kapolisan nga planado na ang tanan nilang angayang buhaton kun mapalpak ang negosasyon uban sa hostage taker nga si kanhi police captain Rolando Mendoza.
Si Aquino miingon nga gipasaligan siya ni PNP Chief Jesus Versoza nga ang mga sakop sa PNP Special Action Force maoy gamiton pag-ataki sa hostage taker ug dili ang bulay-og nga mga sakop sa Special Weapons and Tactics sa Manila Police District.
Laing giangkon ni Aquino mao ang dili maayong kumunikasyon niya uban sa iyang kalihim sa Department of Interior and Local Government nga si Jesse Robredo. Tungod kay di man hingpit ang iyang salig ni Robredo way hustong kumunikasyon tali nilang duha atol sa krisis niadtong Agosto 23. Ang pamahayag sa presidente nga nisalig siya sa saad ni Versoza nagpa-ila nga dili siya “hands-on” nga klase sa lider. Ibutang ta og nisalig siya sa sinugdan, apan syaro og wala gyud siya makabantay nga dili ang PNP SAF maoy miataki sa bus.
Diin man diay siya nga siya makakita sa sitwasyon nga live man sa tibuok kalibutan ang hitabo? Syaro og wala dayon siya makamando nga ang SAF maoy gamiton inay nga ang SWAT. Resulta ba ni sa way maayo nilang kumunikasyon ni Robredo?
Ang iyang pag-angkon nga dili maayo ang iyang relasyon ni Robredo lain ning timailhan nga dili kontrolado ni Aquino ang iyang gobyerno. Ang iyang pagtudlo ni Robredo isip DILG secretary bisan kun kuwang siya sa pagsalig niini nagpasabot nga dunay mas impluwensiyadong padrido ni Robredo nga di niyang kabalibaran.
Ambot ngano? Tungod ba sa utang kabubut-on atol sa kampanya o sa dakong natampo nga pundo sa iyang kandidatura? Ang mga miyembro sa gabinite importante og papel sa usa ka pamunoan hinungdan nga sila angayan gyud nga pinili sa presidente. Ang presidente nga motugot nga dunay laing magbuot kinsay iyang itudlo nga maglangkob sa iyang gabinite nagpaila sa iyang kahaguka.
Tataw nga way gusto si Aquino ni Robredo ug napugos lang ni pag-accommodate niya. Timailhan niini mao nga acting lang si Robredo sa pagkakaron. Si Aquino mismo miangkon nga duna siya’y isyu ni Robredo panahon sa kampanya. Kun gisaligan palang unta ni Aquino ang iyang DILG secretary hayan masulbad unta siguro nga malinawon ang hostage crisis. Kun dili pa lang unta haguka ang liderato ni Aquino hayan way mga kinabuhi nga mausik. Akong subli-on simple ra gyud intawon kaayo ang gidemanda sa hostage taker, mabalik lang siya sa serbisyo. Dili langit ang maong demanda nga maglisod paghatag ang gobyerno hinungdan nga gisakripisyo niini ang kinabuhi sa mga biktima ug ang atong maayong relasyon uban sa Hong Kong.
Lakip sa atong gisakripisyo mao ang atong ekonomiya nga naapektuhan pag-ayo sa mga travel bans. Dili pa igo ang atong imahin isip usa ka nasud atubangan sa tibuok kalibutan.
* * *
- Latest
- Trending
