EDITORYAL - Pamubo sa proseso makatabang batok drugas

CEBU, Philippines - Dako og ikatabang sa kampanya batok sa ginadiling drugas ang pagpangamahan sa Sugboanong si Senador Vicente "Tito" Sotto III sa Senate Bill No. 47 nga nagtinguha pagtukod og special drugs court.

Pinaagi niining maong balaodnon, gitinguha ni Sotto nga ang bag-ong korte nga espesyal nga maminaw sa mga kasong kalapasan sa Akta Republika 9165.

Gitinguha ni Sotto nga mas taas kay sa Regional Trial Court ug tupong sa mga collegial court sama sa Court of Appeals ang maong special drugs court sa tuyo nga kamub-an ang panahon sa pag-apelar sa ilang kaso ug madali ang ilang conviction.

Sa naandan nga proseso karon, ang kaso nga may kalambigitan sa drugas isang-at sa RTC ug adto i-apelar sa Court of Appeals una pa maabot sa Korte Suprema. Tungod niini, mahimong makalangaylangay ang depensa/akusado ug dugay ang pagpenalisar sa desisyon sa iyang kaso ug pagpahamtang sa silot tungod sa kataas sa proseso sa korte.

Kun paspasan ang proseso sa pagpaminaw paingon sa conviction ang mga drug cases, hayan maminusan ang gidaghanon sa mga nalambigit niining maong matang sa negosyo, ilabi na kay dali na lang ang pagpakanaog sa silot sa mga malapason sa anti-drugs law.

Usa sa nakitang bangag niining maong balaod karon mao ang paghatag og piyansa.

Kun paminawon sa mga magbabalaod ang sugyot sa kadaghanan nga pamub-an ang timbang o gramos sa masakmit nga drugas nga dili mahimong mapiyansahan, daghang mga drug pusher ang magtingkagol sa bilanggoan sa kahadlok nga dili na makagawas sa prisohan hangtod dili mahuman ang hearing.

Kun bisan gamay'ng timbang sa shabu ang masakmit gikan sa usa ka drug pusher dili na siya makapiyansa, daghan kanilang nalambigit niining maong ilegal nga negosyo ang mangundang.

Anaa sa balaod magdepende ang malampusong kampanya batok sa ginadiling drugas. Kun ingon kadaghan ug kadako ang buslot sa balaod karon, ang nalambigit niining maong ilegal nga kalihukan kanunay'ng nagkatawa kay daling makalingkawas gikan sa silot nga gilatid sa balaod.

Maayo na lang kay adunay magbabalaod sama ni Sen. Sotto nga nakakita sa ka-importante sa kausaban sa balaod, ilabi na sa pagpamubo sa proseso pagpaminaw sa mga drug cases.