EDITORYAL - Himsog ug abtik

Miatubang sa korte niadtong miaging adlaw si Kongresista Ruben Ecleo Jr.

Gipresentar siya sa abogado sa depensa alang sa direct examination diin iyang gihimakak nga iyang gipatay ang iyang asawa nga si Alona Bacolod-Ecleo.

Abtik kaayong nanubag si Ecleo sa mga pangutana sa iyang abogado nga si Atty. Orlando Salatandre.

Ang pagpadayon og pagdungog sa kasong parricide batok kang Ecleo nagpadayon samtang wala pa makadesisyon ang korte sa mosyon nga gihaon sa mga abogado sa prosekusyon nga nag-awhag sa korte nga ipakanselar ang piyansa ni Ecleo.

Si Ecleo, sumala sa gimbut-an sa balaod, dili unta mahimong makapiyansa tungod sa kagrabe sa krimen nga parricide, sumala sa gisumbong sa katawhan (People of the Philippines) batok kaniya.

Apan nakahimo siya pagpiyansa sa dihang gitugotan sa korte. Ang rason nganong papiyansahon si Ecleo tungod sa findings sa mga doktor nga gipresentar sa depensa nga si Ecleo usa ka ‘walking time bomb’ ug nagkinahanglan kini og operasyon sa kasingkasing.

Tulo na ka tuig sukad nahimong gawasnon si Ecleo.

Taliwala niini, walay puas ang pagbangutan sa pamilyang Bacolod, kinaluhaan sa kahadlok tungod kay ang sinumbong padayong naglaroylaroy ug human niadtong Mayo 10, 2010 nga eleksiyon, nakalingkod sa gahum tungod sa pagkapiling kongresista sa ilang lugar didto sa isla sa Dinagat, Surigao del Norte.

Bisan nakonpirmar diha sa obserbasyon sa publiko nga si Ecleo usa ka himsog nga tawo, ug nga nakahimo sa pagbudlay sa kaugalingon niadtong miaging eleksiyon, ug nga mipatim-aw niadtong Miyerkules nga hearing sa sala ni RTC Judge Soliver Peras diin abtik nga nanubag-tubag sa mga pangutana sa iyang abogado, ang depensa padayong mibarog nga si Ecleo usa ka masakiton nga tawo.

Sukad niadtong gi-insister sa depensa nga si Ecleo operahanan sa kasingkasing, hangtod karon, wala pa gihapon kini makapa-opera.