Unsa g'yuy maayo?

Angay nga uyonan sa Cebu City Hall investigating panel ang request ni Atty. Gloria Lastimosa-Dalawampu nga tugotan ang mga sakop sa media nga makatambong sa imbistigasyon sa kaso sa iyang kliyente.

Si Dalawampu nga abogado ni Lourdes Archua, ang hepe sa Cebu City Medical Center credit ug billing section, gisuspenso kay siya ang unang miangkon nga maoy mi-release sa daghang tseke sa PhilHealth ngadto sa usa ka mangingilad.

Ang gikabalak-an ni Dalawampu nga ang proceedings sa pag-hearing sa kaso sa iyang kliyente dili kaayo mamaayo sa pagka-record ug basin makapa-apeke unya kini ni Archua.

Apan si City Administrator Jose Mari Poblete nga sakop sa Five-Man investigating panel miingon nga dunay mga stenographers gikan sa City Secretary’s office nga maoy morekord sa proceedings.

Gisalikway ni Atty. Poblete ang pagduda nga ang mga stenographer dunay dapigan og nga tuyoon lang g’yud ang pagmaniubra ang record sa proceedings.

Nakasabot ko sa kabalaka sa pipila ka sakop sa investigating panel kay kun daghan na nga media ang mo-cover, ilabi na ang mga cameramen sa TV ug mantalaan, posible nga mabalda ang ilang proceedings.

Buyno, kun ako’y kuhaan og pamahayag, mahimo tingali nga ang mga cameramen maoy dili tugotan sulod sa lawak nga adto himoa ang hearing sa kaso unya sa Septiyembre 1.

Sa korte bitaw, wala man did-i ang mga reporters nga mo-cover sa hearing, ang mga photographers ra man.

Mao nga kini maoy angay’ng sundon sa mga sakop sa investigating panel ug tugotan nila ang media nga makatambong sa husay sa kaso. Ang publiko gud angay nga masayud sa kalamboan sa nagpadayong imbistigasyon sa pagkahanaw sa 28 ka tseke sa PhilHealth gikan sa CCMC.

Alegre g’yud niini kun anaa na sa depensa ang pagpresentar sa ilang mga panagang. Sigurado man g’yud nga itudlo ni Archua ang laing kawani sa City Hall nga si Mary Grace Lopez nga maoy nag-release sa tseke.

Kadali g’yud tawon nailad sa mga kawani sa dakbayan uy. Usa ka babaye nga nagpaila nga taga Pag-IBIG nga mokuha kuno sa mga tseke gihatag dayon nila.

Wala gayud sila mangutana kun asa nga department sa Pag-IBIG madistino ug mihimo’g counter check. Kun ila pa kini nga gihimo, dili sila mabiktima, madakpan pa kadtong babaye nga nagpaila nga Concha Ruth Adlawan.

Hinay ra g’yud mo.

* * *

Pabor g’yud kaayo ko nga paspasan na usab paghimo og kampanya kining mga sakyanan nga ipataka lang og parking daplin sa karsada. Daghan man g’yud nga mga drayber nga tingali ang naantigohan mao ra ang pagpadagan. Motoo mo, o dili?

Kagahapon, pagsulod nako sa karsada paingon sa GMA gikan sa Busay Barangay Hall, dunay sakyanan nga gi-parking sa babaye nga drayber diha sa left side. Kay likoanan man ang maong dapit, kun dunay kusog-kusog nga mopadagan, madam-agan g’yud unta.

Nindot unta kadto kun nadam-agan pa og daku nga sakyanan kay aron maleksyon kadtong danghag nga drayber.

* * *

Angay na tingali nga ang kadagkoan sa Department of Energy (DOE) mohimo og pakisusi sa mga gasolinahan kay nagtoo ko nga dunay uban nga mihimo na og binilyako nga kalihukan aron makaganansya og daku. May higala ko nga nakabantay nga mihinay ang pwersa sa iyang makina sa sakyanan sa milabay’ng mga adlaw.

Nagtoo siya nga loss compression na ang iyang makina ug magkinahanglan na nga bag-ohan og piston ring.

Apan dihang mibalhin siya og gasolinahan nga gipalitan niya sa iyang konsumo nga gasolina, mibalik ang pwersa sa iyang sakyanan.