EDITORYAL - Dawata ang kaparotan

Wala makalikay sa mga pasangil nga adunay pamolitika, electioneering ug binayranay ang bag-ohay lang nahuman nga eleksiyon sa unta non-partisan, apolitical nga Philippine Councilors’ League-Cebu Chapter.

Ang kampo sa Liberal party pinanguluhan sa standard bearer niini nga si Konsehal Romeo Villarante sa Talisay City mipasangil og mga iregularidad sa pagpahigayon sa eleksiyon   sa PCL sa Cebu International Convention Center (CICC).

Matud ni Villarante, kinsa usa ka abogado, P4,500 ngadto sa P5,000 ang nadawat sa mga konsehal atol sa eleksiyon.

Sama sa gihapon, kun adunay mga pasangil nga iregularidad, ang pikas kampo kutob lang sa paghimakak.

Apan nahuman na ang eleksiyon. Bisan aduna pay mo-execute og affidavit aron suportahan ang pasangil ni Villarante nga adunay binayranay nga nanghitabo aron modaog ang mga kandidato sa atbang nila nga partido, ang One Cebu, makuli na nga mausab pa ang resulta sa eleksiyon.

Angayan na lang dawaton sa mga nangapilde ang resulta. Ug angayang dawaton ang kamatuoran nga aduna pa gyuy nahibiling impluwensiya si Gob. Gwendolyn Garcia nga bisan kinsa ang ituboy niini, adunay kahigayonang makadaog sa unsa nga piniliay.

Karon nga si Konsehal Carmen “Ivy” Durano-Meca sa Bakud Party na ang napiling presidente ug mao nay molingkod isip ex-officio member sa Hunta Probinsiyal sa lalawigan sa Sugbo, angayang suportahan ang iyang liderato aron silang mga konsehal sa lalawigan adunay tingog ug makahimo og mga programa ug proyekto alang sa tagsatagsa nila ka lokal nga kagamhanan.

Dili hinuon angayang maguol ang mga konsehal sa Liberal Party bisan wala sila makakuha og posisyon sa PCL-Cebu Chapter tungod kay ang nagdala sa renda sa nasyonal nga kagamhanan kauban man nila sa partido.

Kun modawat sa kaparotan ang mga nangapilde, maka-uswag na sa unahan ang PCL-Cebu Chapter.