Fake nga LTO agent

Unsa kining report nga akong nadungog nga gipaimbistigar kuno sa kadagkoan sa Mactan Cebu International Airport Authority (MCIAA) kun nganong nahibaw-an sa media ang paghatag nila og P500 mil sa miretiro nila nga kauban?

Ka dakung kataw-anan god ani nga pagkabutanga. Unsa, buot ba nila nga walay inpormasyon nga mabutyag diha sa airport kabahin sa mga kwestyonable nga transaksyon?

Karong semanaha, ang akong mga tinubdan gikan sa lainlaing department diha sa airport mipasalig na usab nga hatagan ko nila og dugang inpormasyon kabahin sa mga kwestyonable nga kalihukan. Buot ba nila nga mangahadlok ang mga kawani ug dili na mohatag og mga inpormasyon sa mga reporters? Hunonga ninyo kana uy, labaw pa nga sawayon kamo sa mga tawo.

Sigurado ko nga mapadali pa hinoon ang inyong pagkapapha sa inyong mga katungdanan.

Nakabantay ra ba ko nga kaniadto, kusog kaayo motubag si airport manager Danny Agusto Francia sa akong mga pangutana kaniya. Bisan sa text messages motubag dayon siya.

Apan sukad sa miaging semana, wala na g’yud siya motubag. Ngano kaha? Sayud ko nga ang airport sa miaging tuig nakaganansya og kapin sa P400 milyones sa tibuok tuig nga koleksyon nila sa lainlaing mga kolektahonon sama sa nag-abang diha og luna sa airport, gikan sa mga airline companies, mga bangko, balay-patigayon ug sa mga terminal fees.

Apan sa ako na nga giingon nga kun duna’y ganansya ang airport wala kini magpasabot nga inyo na kini nga usik-usikan. Mao pay pwerteng dagkoa anang inyong mga honoraryom, unya mohatag pa g’yud kamo og dagku nga pabawon.

Bi nganong wala man lagi kamo mohatag sa ubang mga sakop sa airport board nga nakaserbisyo usab diha?

Ang akong awhag sa akong mga inpormer diha sa airport nga ayaw kamo kahadlok. Dugangi pa ang mga inpormasyon nga inyong gihatag nako.

* * *

Nalipay ko kay nadakpan g’yud sa mga tanod kagahapon sa udto ang usa ka mangingilad nga nagpatoo nga LTO agent unya manakop sa mga drayber apan igo lang pangwartahon.

Maayo ra nga nadakpan g’yud sa mga tanod si Rickie P. Rivas, 31-anyos, walay asawa, ug taga barangay Kalubihan ning dakbayan sa Sugbo.

Miangkon siya atul sa interview sa mga reporters atubangan ni Cebu City traffic chief Andres Bayarcal nga gikilkilan g’yud niya ang drayber nga si Epefanio Bacaro.

Matud ni Bacaro nga nag-parking siya didto sa dalan Manalili kagahapon sa udto dihang giduol ni Rivas ug nagpaila nga LTO agent.

Gipangayo ang lisensya ni Bacaro ug giingnan nga isyuhan siya og TOP kay nag-double park. Gipangayoan og kwarta si Bacaro, apan misakay kini sa Strada nga gimaneho ni Bacaro.

Human madawat ang P200, mikanaug si Rivas didto sa eskena Borromeo ug Leon Kilat. Si Bacaro abtik nga nangita’g polis apan tanod sa barangay Kalubihan ang iyang nakit-an.

Abtik nga miresponse ang upat ka tanod ug gidakop nila si Rivas. Usa sa nakapatahap ni Bacaro nga si Rivas dili g’yud LTO agent kay nag-tsinilas ra ni.

Pastilan, LTO deputized agent kini si Rivas kaniadto apan gitaktak kay nakahimo’g salaud. Apan ang problema kay ang iyang TOP wala g’yud niya iuli.

Maayo unta og mapriso g’yud kini si Rivas kay nagpakauwaw lang kini. Unya, nganong daghan man siya og mga higala sa mga sakop sa Citom? Unsa mga kakonsabo mo sa iyang binuang?