Balaud wa ipatuman

Ang kapakyas pagpatuman sa balaud nga gilatid sa Transportation and Traffic Code maoy rason nga dili mahadlok ang mga drayber nga moabuso sa ilang pagmaneho.

Apan estrikto pa ang kadagkoan sa Land Transportation Office (LTO) nga mipatuman sa lagda nga gilatid sa section 27 sa Republic Act 4136, minus ra g’yud ang mga abusadong drayber.

Kining maong balaud mosuspenso sa lisensya sa drayber sa gidugayon nga dili mosubra sa duha ka tuig, o kaha rebokahon, kun makahimo og salaud sa trapiko ug makonbikto.

Maisip na nga “konbikto” ang usa ka drayber kun siya madakpan paghimo’g subra sa duha ka salaud sa lagda sa tukmang pagmaneho ug sa mga gilatid sa R.A. 4136 unya mobayad siya’g multa.

Aron dili siya makamulta, kwestyonon niya ang pagdakop kaniya sa usa ka traffic enforcer adto sa korte ug pamatud-an nga dili siya sad-an. Kinsa man kaha ang drayber nga makahimo niini nga daku man kaayo’g gasto ang pagpasaka og kaso.

Alang nako, nagkuwang g’yud ang kadagkoan sa LTO pagpatuman niining maong partikular nga lagda diha sa Transportation and Traffic Code. Suwayi ra gud ninyo nga estriktohon ang pagpatuman niini dili ba mabantayan ninyo nga mosunod na gayud ang mga drayber sa tukmang mga lagda.

* * *

Sa tigum sa mga sakop sa Regional Road Safety Council nga gitambongan sa mga tag-iya og bus ug taksi kaniadtong miaging hapon, nahisgotan nga daghang dapit nga walay road safety signages.

Ang road safety signages mao kanang mga karatola nga sagad “signs” nga mogiya sa mga drayber unsay porma sa karsada nga ilang padulngan ug uban pa nga mga pahimangno.

Sama sa usa ka “sign” nga deboho sa duha ka sakyanan nga naglumbaanay unya gisulod sa pula nga lingin, unya may babag sa tunga nga pinahandag, nagpasabot kini nga “No Overtaking.”

Apan dunay “operator” nga nangutana kun nasayud o nakahibalo ba kaha niini ang mga drayber? Wala ko kapugong sa pagpanglingo-lingo.

Kadtong mga drayber nga wala masayud sa kahulogan, bisan sa mga common kaayo nga mga traffic signs, angay’ng kuhaan sa iyang lisensya ug dili na tugotan nga maka-drive og sakyanan.

Timan-i nga ang pag-drive og sakyanan dili katungod sa usa ka tawo sa paghimugso niya dinhi sa kalibotan, kun dili prebiliheyo lang kini nga gihatag kanato sa kagamhanan.

Nagpasabot nga kay prebiliheyo ra man ug dili g’yud katungod sa tawo nga makabaton og driver’s license mahimo kini nga kuhaon sa bisan unsa nga higayon kun makita nga dili ka angayan nga hatagan.

Bisan og si LTO-7 legal officer Vicente Gador Jr. miinsister nga gipatuman nila kini, apan kuwang ko og pagtoo. Aw kay abogado man si Gador hagiton nako siya nga pamatud-an ang iyang gisulti. Tan-awon nato kun pila sa mga drayber nga nagbalik-balik ra nga madakpan ang ilang napasuspenso ang lisensya.

Dihang LTO deputized agent ko kaniadto, diha pa gani’y drayber nga akong nasita nga nadakpan nako mga wala pa’y oras gikan sa pagdakop kaniya sa laing enforcer.

Bi tan-awon nato ang inyong lista kun kadtong maong drayber nga na-TOP na, unya nadakpan na usab nako, inyo ba nga gisuspenso ang lisensya.

Wala pa ko malimot nga ang maong drayber, nga dia pa nako karon ang ngalan, mitug-an nga makadaghan na siya madakpi ug mibayad lang og multa.