Abtik g'yud si Tommy

Gidayeg nako si Mayor Tomas R. Osmeña kay abtik kini nga nakabantay og usa ka dili maayo nga bahin sa Joint Venture Agreement tali sa dakbayan ug sa Pilipinas Water Resources Inc. alang sa pagsuplay og tubig sa mga investors diha sa South Road Properties.

Tinuod g’yod nga lantip og salabotan si Tommy ug “fast reader” kay nabantayan niya ang usa ka gilatid sa kasabotan nga mabentahaan ang dakbayan. Nganong wala man kadto mabantayi sa daghang mga konsehal sa dakbayan?

Maayo ba diay ninyo si Tommy kay bisan kausa ra gibasa nasakpan ang usa ka bahin nga dili maayo? Tsk! Tsk! Tsk!

Duna man go’y kabahin sa kasabotan nga mora’g nagpasabot nga ang dakbayan mo-contribute sa yuta ngadto sa PWRI. Misinta si Tommy kay masabot man tuod nga mora’g ihatag sa dakbayan ang maong yuta ngadto sa water supplier.

Ang termino gipausab ni Tommy nga inay “contribute” ang dakbayan motugot na lang sa PWRI nga makagamit og lote diha sa SRP alang sa ilang kalihukan.

Husto si Tommy kay basin og inigkahuman sa kontrata, ibutang nato nga nangamatay na ang mga opisyal sa dakbayan kay 30 gud ka tuig ang termino, basin og mahimo ra nga ibaligya sa PWRI ang maong lote.

Angay’ng maniguro lang g’yud. Bilib kong Tommy niining maong punto kay wala niya huna-hunaa nga ang tag-iya sa PWRI mao si Michel Lhuillier nga suod niyang higala.

* * *

Sa ubang dapit sa kaulohan nangandam na sila sa pag-abot sa ting-uwan. Gisugdan na nila pagpabakwit gikan sa mga kuyaw nga dapit kadtong mga lumulopyo sama niadtong nagpuyo daplin sa kasapaan.

Dinhi sa dakbayan sa Sugbo kuwang ko og pagtoo nga mahimo kini sa atong mga opisyal sa dakbayan.

Kaniadto, gipahunong ni Tommy ang demolition sa kabalayan nga anaa sa sapa sa Mahiga Creek kay klase pa man, basin og apektado ang pagtungha sa kabataan.

Apan karon wala nay klase, ug hapit na usab ang tingbukas sa klase. Sa milabay’ng mga buwan wala nila himoa ang pagpapahawa sa maong mga lumulopyo kang kansang kabalayan anaa sa kasapaan kay hibawo ka na, eleksyon.

Ang mahitabo karon malagmit nga moingon na lang usab si Tommy nga bahala na si incoming Mayor Michael Rama nga mosulbad sa maong problema ug manghunaw na lang siya.

* * *

Grabeng huota sa mga sakyanan nga moagi diha sa V. Sotto Street paingon sa pantalan. Tungod kini sa daghang mga nasunogan nga anaa moestar sa karsada.

Unsay gihimo sa atong mga tinugyanan sa dakbayan? Trabaho tingali kini sa Squatters Prevention Encroachment Elimination Division. Apan kanunay nga nagyawyaw si SPEED chief Vicente Mercado kay kuwang siya’g mga sakop.

Unsaon nga ang walo sa iyang mga sakop gikuha man gikan kaniya ug anaa karon gipauban-uban ni Gerry Marquez, nga consultant sa urban poor sa dakbayan.

Nahibulong ko nganong nagpauban-uban man og pito g’yud ka mga tawo kini si Marquez. Unsa, duna bay mopatay kaniya kay nagbaton siya og bodyguard?

Karon kay duna may dakung problema diha sa pag-encroach sa mga tawo sa karsada, gamita kanang imong mga tawo Mr. Marquez. Unya, ikaw Arnel Tancinco, isip executive officer sa CITOM, destinohi og mga traffic enforcers ang maong dapit.