Panid-an nato si Mike

Misamot ang akong kahinam ug nangindahay nga gipasalig ni Cebu City mayor-elect Mike Rama nga sugod Hulyo 1 kinahanglang wala na g’yud kuno’y mga ligoy nga kawani ang City Hall.

Kun matuman kini sa bag-ong mayor, ako maoy unang mosaludo kaniya ug nakaingon nga wala g’yud diay masayop ang katawhan nga mibotar kaniya sa miaging eleksyon.

Matud ni Rama nga kugihan siya nga pagka opisyal. Buyno, nindot ug nalipay kaayo ako niini mayor. Apan siguroa lang g’yud nga tumanon nimo ang imong panaad.

Dili ra ba g’yud ko malimot mayor ug dili ra ba g’yud ko magpanuko sa pagsukmat kun ang pasalig wala tumana.

Sama ra bitaw ni Kongresista Antonio Cuenco nga gihinganlan nako og bakakon kay dihang midaug siya sa eleksyon niadtong 2007, mipasiatab dayon siya nga magpatukod siya og flyover diha sa eskena V. Rama Avenue ug Natalio Bacalso.

Kutob ra sa pagpanghambog si Cuenco kay wala gayud kini matuman hangtud nga napupos na lang ang iyang termino.

Natan-aw man gud namong mga City Hall reporters nga pwerteng daghana sa mga kawani sa siyudad nga wala g’yuy tarong trabaho.

Ambot lang og tumanon ba niya ang gisaad ni Mike. Iya kunong tan-awon nganong ang usa sa mga consultant nga si Gerry Marquez kanunay man nga giuban-ubanan og pito ka kawani.

Kun imong tan-awon ang accomplishment ni Gerry Marquez basi sa gisumiter niya sa konseho atul nga magpa-renew siya sa iyang pagka consultant, wala g’yuy ayo.

Dili ma-justify nga magbaton siya og pito ka sakop. Anhi ko modayeg ni Rama kun matangtangan niya’g sakop kini si Marquez nga daw iyang ikog, kun asa lakaw tua.

Kun wala pa si Marquez moabut sa City Hall inigka buntag, anaa magpundok atubangan o kaha kilid sa City Hall nagpalandong sa kahoy. Anugon sa buhis sa katawhan nga gisweldo kanila.

Unya, akong gihagit si Mike nga likayan ang pagkuha og mga consultant nga walay trabaho, klaro kaayo nga gitudlo tungod lang sa “political accommodation.”

Palihug mayor Mike, i-review ang mga consultant kay daghan diha nga bisan ang pag-atubang sa konseho atol sa pag-renew sa ilang kontrata dili gani makatunga.

Sayonan ka nga ang ubang consultant diha nagdawat og honorarium nga tag P18,000 ang buwan, ang uban P9,000.

Duna hinooy mga consultant nga nagtrabaho ug anaa gani makita kanunay sa sesyon kay kaabag man sila sa mga konsehal, apan ang uban pastilan.

Suheto kaayo ko ani tungod kay usa ako sa mga konsehal nga motan-aw gayud sa rekords sa accomplishment sa mga gisweldohan sa buhis sa katawhan.

Ang pagsweldo og tawo nga walay klarong trabaho pinaagi sa pagtudlo kaniya nga consultant maisip ra nga pag-usik-usik sa kwarta sa katawhan.

Ang lagda mao nga ang usa ka ahensya o local government unit mokuha lang og consultant kun wala kini’y kawani nga makamao sa iyang trabaho.

Apan daghan diha nga gikuha nga consultant nga nag-duplicate lang sa trabaho sa uban. Sa among interview ni Mike kagahapon, diha pa gihapon ang iyang kinaiya nga kusog kaayo molihay pagtubag og isyu.

Ang mga sakop sa media dili man angay’ng gamitan og inabogado nga tubag. Pasabton lang nimo sila sa labing tinuod.

Kay kun dili kamo motug-an unya mahibaw-an ra gihapon kini sa media gikan sa ubang tinubdan, tabla ra kamo nga bakakon.