Nindot nga election

Menus ang mga election cases nga masang-at sa korte karon nga gigamitan na og information technology ang 2010 nga piniliay.

Maglisod sa pagprobar ang usa ka kandidato nga gitikasan siya sa eleksiyon tungod kay ang resulta sa miaging Lunes nga eleksiyon migawas man nga mas labing kasaligan kay sa mano-mano nga gisagop sa nanglabay nga eleksiyon.

Usa ka timaan nga misalig ang mga Pilipino sa automated election ning tuiga mao ang sayo nga pagka-concede sa mga presidentiables kagahapon.

Sa mano-mano nga ihap, ang Election Returns dad-on pa sa presidential election canvassers nga mao ang hiniusang Kongreso una pa mahibaw-an nato kinsa gyud ang midaog pagka-presidente. Karon, walay 24–oras sukad nahuman ang eleksiyon, nahibalo na kita kinsay ipuli sa unpopular nga pamuno nasud nga si Gloria Arroyo.

Makalaum kita nga sa mosunod nga eleksiyon, mas han-ay na ang proseso tungod kay ang mga kasaypanan niadtong Lunes makorehian na sa mosunod, tingale 2013 nga midterm elections.

Apan nianang mga panahona, kinahanglang doble na ang atong pagbantay bisan fully automated na ang atong eleksiyon. Kun walay tikas niadtong Lunes nga eleksiyon tungod sa kahigpit sa atong pagbantay, ang ato unyang kompiyansa maoy makahatag og ginta sa mga tikasan nga makapanikas pinaagi sa mga systems hackers nga nagtuyoktuyok sa nasud.

Kun sama kahigpit ang atong pagbantay sa wala pa ang Mayo 10, 2010 nga eleksiyon, nga gamay’ng suliran sa PCOS machines ug gamay nga senyales sa tikas ato dayon nga ipublikar ug makabantay ang posibleng mga tikasan.

Kun ingon niini kalimpyo ang mosunod nato nga eleksiyon, ang mga gago ug kawatan sa gobyerno mag-anam-anam na og kahilis.

Ang mga electoral fraud nga kasagaran natong mabatian ini’g human gayod sa mga eleksiyon nga ipasangreklamo ngadto sa Comelec o sa korte, dili na unya nato mabatian.

Apan ang dako og natampo sa malinawon natong eleksiyon mao ang Simbahang Katoliko Romano nga mihalad sa maong labing dakong politikanhong kalihukan sa nasud ngadto sa atong Ginoo.

Sa wala pa ang eleksiyon, matag Simbahan mibatbat sa Oratio Emparata aron magmalinawon ang eleksiyon. Sa adlaw sa election, gi-expose ang Santisimo Sacramento sa altar aron ang mga Katoliko mag-ampo sa dili pa ug human sa pagbotar. Walay labing gamhanan nga makapa-usab sa sitwasyon kun dili ang pag-ampo sa katawhan.

Ang Parish Pastoral Council for Responsible Voting (PPCRV) nakatabang usab og dako pinaagi sa pag-deploy og mga batan-on nga adunay bitbit nga laptop diin ang mga botante mahimong makalili sa numero sa presinto ug cluster asa siya makabotar.

* * *

Karon nga naglawig si Noynoy Aquino sa pagka-presidente, nakaseguro ko nga gikuyawkuyawan na si Pres. Arroyo ug iyang pamilya niining panahona.

Posibleng magpusotpusot ang mga kaso nga atubangon sa presidente ini’g human unya sa iyang termino sa udto sa Hunyo 30, tungod sa mga kuwestiyonable niyang mga transaksiyon sama sa ZTE broadband deal, Hello Garci controversy niadtong 2004 ug uban pa.

Sa ikaduhang distrito sa Pampanga, nag-una si Pres. Arroyo sa bugno pagka-kongresista human siya makakuha og 158,034 botos hangtod alas 5:30 kagahapon.

Busa seguro na siya nga makalingkod sa Ubos Balay Balaoranan.

Gidungog na nga si Arroyo buot mahimong Speaker of the House.

Mas labaw kining bantayanan tungod kay kun mahimo na nga Speaker si Arroyo, unya daghan sa iyang mga kaalyado sa iyang administrasyon karon ang nangapili ug nasublian, mas sayon na lang nila paghulma og mayoriya sa Kamara ug si Arroyo gihapon ang hawod sa atong mahal nga nasud.

Kun kang Arroyo ang mayoriya sa Kongreso, mas sayon na usab alang kanila ang pagpa-usab sa Konstitusyon pinaagi sa ikaduhang paagi nga mao ang Constitutional Assembly (Con-Ass) ug dili ang naandan nga Constitutional Convention (Con-Con).

Ang Con-Con maoy labing kredible nga paagi sa pag-usab sa Konstitusyon tungod kay niining paagiha makapadala ang katawhan og mga delegado sa convention – mga delegado nga kasaligan ug adunay kasinatian sa pamalaod.

Ang Con-Ass maoy labing kahadlokan nga paagi sa pag-usab sa Konstitusyon kay niining paagiha, ang mga kongresista sa Kongreso lang ang magbuotbuot og suksok og mga probisyon sa Konstitusyon nga mahimong mopabor sa ilang interes ug sa interes sa ilang amo, nga nianang higayona si Arroyo.

Walay laing bantayan sa Charter change gawas sa pagduso sa Parliamentary form of government tungod kay nianang higayona, ang isuksok sa unang parliament mao si Arroyo nga Prime Minister.

Ang presidente sa Pilipinas nga wala higustoi sa mga Pilipino maoy Prime Minister, mao gihapoy head of government?

Pagkapait bayang pamation!