EDITORYAL - Pangrakrak dili katuohan

Desperadong buhat sa mga galawgaw nga mga kandidato sa Lunes, Mayo 10 nga eleksiyon ang pagdangop sa pagpangrakrak.

Katapusang insidente nga naglambigit og pagpangrakrak mao ang nahitabo sa barangay hall sa barangay Canjulao, dakbayan sa Lapulapu nga matud gipa-ulanan kuno og mga bala.

Laing insidente didto sa Sta. Fe, isla sa Bantayan diin ang headquarters sa kandidato pagka-mayor girakrakan; sa Argao, awto sa giingong tawo sa mga Garcia ang girakrakan.

Dili angay tagdon sa mga awtoridad kining mga hitaboa tungod kay gusto lamang sa usa ka habig sa mga politiko nga mahulagway’ng gubot ang ilang lugar aron ibutang sa Comelec watchlist.

Sama sa nahitabo sa Canjulao, kun tinud-anay pa ang pangrakrak, aduna na untay naigo nga opisyal o kawani sa barangay hall. Apan ang kapitan sa maong barangay nga si Rufo Bering nga nagpatingalatingala sa hitabo, kandidato pagka-konsehal sa oposisyon.

Hangtod karon, ang oposisyon sa Lapulapu wala pa mahilom sa ilang tinguha nga mabutang sa watchlist ang maong malinawon nga dakbayan sa Lunes nga eleksiyon.