Anomaliya sa City Hall?

Angay’ng tagdon ug ayohon g’yod pag-imbistigar ang reklamo sa tagdumala sa Cebu East Asia Services Corporation kabahin sa giingong iregularidad sa mga sakop sa Cebu City Bids and Awards Committee.

Mireklamo ang tagdumala sa maong janitorial agency kay samtang sila kuno ang lowest bidder pagsuplay og 25 ka janitors sa Cebu City Medical Center apan ang kontrata didto man i-award sa laing kontraktor.

Wala usab makapasabot niining maong isyu si city administrator Francisco “Bimbo” Fernandez kay bisan og ako siya’ng gipadad-an og komunikasyon nga mointerview ko niya, di makontak.

Usahay bitaw mahiubos kaming ubang City Hall reporter kay may pinili kini si Bimbo sa mga reporters nga maoy iyang pakighinabian.

Na hala, tubaga ninyo ang isyu nga gireklamo ni Macario Quevedo ngadto mismo ni Mayor Tomas Osmeña. Ang city legal office maoy gitahasan sa pag-imbistigar niining maong reklamo.

* * *

Bilib ko sa “fighting spirit” niining ubang kandidato pagka mayor dinhi sa dakbayan kay bisan og klaro na sila kaayo nga pilde, wala kawad-i sa paglaum nga makadaug. Kataw-anan.

Bisan pa og ibutang nato nga mas maayo pa kamo nga kandidato kay kang Vice Mayor Michael Rama, apan unsaon man ninyo pagdaug nga ang inyong kampanya kutob ra man sa media.

Ang uban gani, wala pa gyoy political advertisement ug mogamit lang tawon sa ilang mga higala sa media aron ang ilang pamahayag makarga sa mantalaan. Paita uy.

Sa tanang kandidato pagka mayor, si Rama dili mabentahaan. Lantip og salabotan ug taas kaayo’g kasinatian. Ang ako lang ni Rama mao nga angay g’yod nga duna siya’y “political will.”

Unya, tan-awon unta ni Rama kining mga kawani sa City Hall nga walay klarong trabaho.

Putlon na unta ni Rama, kun mapili na siya nga mayor, kining paagi nga usa ka consultant sa City Hall kanunay’ng gisunod-sunod og pito ka kawani nga daw sama na hinoon sa iyang bodyguards.

* * *

Atensyon mga sakop sa Pacaña clan nga gipangulohan nilang Konsehal Arsenio Pacaña ug Rodolfo Pacaña, duna kamo’y grand reunion karong adlawa ug ugma.

Ang ika-13 nga grand reunion adto kini himoa sa Loay, Bohol. Hala ayaw ninyo sipyata ang pagtambong sa maong kalihukan.

* * *

Kadtong dunay mga reklamo kabahin sa mga binuang sa mga kawani sa kagamhanan, akong giawhag nga ipadala kini sa akong e-mail address nga mao ang [email protected] ug [email protected].

Kami god nga mga sakop sa media dili epektibo kun dili moabag ang publiko kay dili man tanang inpormasyon ang among mahibaw-an.

* * *

Ang Visayan Electric Company (VECO) miawhag sa mga taga Naga nga pailisan nila ang ilang incandescent bulbs nianang bag-o nga bombelya nga mas hayag apan minus og kuryente nga magamit.

Gipahibalo ni Veco information officer Ethel Natera nga tibuok adlaw karong adlawa anha sila sa Naga City Hall magpaabot niadtong mga magpailis sa ilang bombelya. Hala pahimusli kini nga tanyag.

Ako hinoon, dili na makapahimulos kay dugay na nga ang bag-ong matang sa bombelya nga hayag kaayo apan minus og magamit nga kuryente maoy akong gigamit.

Ang tumong niini mao ang pagpaminus sa konsumo sa kuryente isip paagi nga maminusan ang mga brownouts.