Hapit na gyud!

Tan-aw nako, gumikan sa ka-advance na sa kahimanan sa communication ug information, diin, muabot kini sa kinasuk-ang dapit sa tibuok nasud, majority sa katawhan, dugay nang nakahukom kinsa ang ilang botohan karong Mayo 10. Kini tungod kay dugay na silang nasayod sa mga isyu ug dugay na nilang gi-ayag ang maong mga isyo. Mao kini ang nahitabo sa 2007 election, diin sa kadaghan sa kwarta nga gibubo sa administrasyon, hapit ma-zero ang mga kandidato ni Gloria. Lakip ang iyang mga favorite candidates, sila si Pichay, Defensor ug Singson, wa gyud manimaho.

Sa ato pa, wala madala sa propaganda, wala madala sa kwarta ang katawhan. Nagpasabot nga edukado na karon ang atong mga pumipili. Among others, gumikan sa influence sa media. Sa ato pa, dili na sila madala sa mga pasalig ug mga saad. Dili na madala sa mga campaign materials.

Lagmit mao usab kini ang mahitabo karong eleksyona. Mahimo nga maghitak gihapon ang kwarta, apan sa giingon ni Serging (kahinumdom mo ?) lagmit, tukbon ang paon, iluwa ang taga. Ingon na niini ka-wise ang atong pumipili karon. Bisan sa ka-barangayan, ang gitawag nga masa votes, wise na sila karon.

Dugay na silang nasayod sa mga isyo. Sa ato pa, dili na madalag bombardiyo sa mga political ads ug mga paukyab sa mga kandidato.

Yuna pa, ngano man tuod nga kun si Mayor Tomas Osmeña ang mohatag og kaayohan sa katawhan, isipon man nila nga pamolitka, apan, kun silay manghatag og lungon, dili pamolitika? Balik sa atong tema – nausab na karon ang senaryo sa politika sa nasud. Lahi na sa unang mga panahon nga gumikan sa kakulang o ka-walay igong information, sayon dang malingla ang mga pumipili.

Apan, karon, sa ako nang giingon, gumikan sa ka-advance sa communications technology, dili na malingla ang katawhan, gani, ang uban kanila, mas-bright pa tingali kay sa mga kandidato mismo. Well informed na sila. Mao kini ang na-overloook sa atong mga politiko. Nakalimot sila nga sa panahon ni Marcos, iya ni Marcos ang tanang Gobernador ug Mayor, mga Kongresista, ug mga dagkung lider sa politka sa tibuok nasud, apan, unsa may nahitabo?

Sa ato pa, aduna nay independenting panghunahuna ang katawhan, dili na kinahanglan motuman sa gusto sa ilang gobernador o mayor og kinsa ang ilang botohan Pagka-Presidente, ug pagka-Senador. Ingonman, mahimo nga mobotar sila sa ilang Mayor, apan, di kinahanglan mobotar usab sila sa incumbent nga Gobernador. Mao na kini karon ang reality sa atong eleksyon ning bag-ong panahon.

Ug kun mao kini ang mahitabo karong eleksyona, personally, alang nako, bahala nag kinsay mudaog pagka-Presidente, basta ma-reflected gayud ang tinuod nga sentimento sa katawhan, sinugdanan na kini sa tingusbawan sa atong nasud. Kaylagi, gidungog na ug mao nay mopatigbabaw ang tingog sa Haring Lungsod. Sa una gong mga panahon, ang tingog sa Haring Lungsod, malapawan man sa tinaginting sa salapi. Apan, karon, tan-aw nako, mag-usik-usik lang gyud sila sa ilang kwarta, kun mao gihapoy ilang pagtoo nga mapalit gihapon ang lungsod.

Mom-Sir, di na baya tingali. Ikaw, Dro, for sale gihapon ka?