Mga mabudhi-on
Karong semanaha ang giisip nga usa sa labing mahinungdanong pahina sa kinabuhi ni HesuKristo sa kalibutan. Gikan sa iyang pagpasakit, pagkamatay ug pagkabanhaw, gikinahanglan nga hinuklogan sa matag Kristiyano. Ang pagpasakit ni Kristo nahipatik nang daan sa iyang tuyo ug tumong sa pagpakatawo ning kalibutana. Sa kadaghan sa mga karakter nga nalakip sa kinabuhi sa Ginoo atol sa iyang 33 ka tuig nga pagpuyo sa kalibutan, kontrobersyal ang karakter nga gihuptan ni Judas Escariot. Ang iyang pagbudhi ni Kristo ang nibukas sa kahigayonan nga natuman ang tanang mga panaad sa kasulatan. Gihinulsolan ni Hudas ang iyang gibuhat nga pagbaligya sa Ginoo baylo sa pilak. Apan ang nakapait, naghikog si Hudas human sa iyang pagbasol.
Ang pagbudhi ang usa sa labing bati nga gawi sa usa ka tawo. Ang pagtraydor ang maisip nga labing yawan-on nga mahimo sa usa ka tawo ngadto sa iyang isig ka tawo. Ang pagbudhi gikan pa sa panahon ni Eba ug ni Adan kinsa nisaad nga ilang tumanon ang pasidaan nga di' nila kan-on ang prutas nga makita tunga-tunga sa paraiso, hangtud na sa panahon ni Hudas susama lang ang gibug-aton. Ang pagbudhi kaniadto hangtud karon, sakit gihapon palandungon sa matag usa kanato nga nabiktima sa maong matang sa batasan.
Apan unsa pamay mas sakit nga pagbudhi kung ikaw mismo nakakita ug nibati sa maong matang sa pagtraydor? Karong panahon sa piniliay, lain-laing nawong sa pagtraydor ang imong makita. Ang pagbali sa usa ka politiko o partido ngadto sa laing grupo, di' na to isipon nga usa ka normal nga sitwasyon nalang sa politika sa nasud. Bisan asang anggulo tan-awon, pagtraydor gihapon ang ilang gihimo. Ang pagdayeg sa usa ka politika sa usa ka partido apan sa katapusan tua na nakapusta sa pikas tungod kay nagtuo siyang mao ni maghatud kaniya sa siguradong kadaugan, usa gihapon ni ka matang sa pagbudhi.
Wa' nay mas traydor pa sa mga politiko nga nasayod nang daan sa mga balaod sa piniliay apan nagpadayon gihapon sa paghimo sa mga ilegal. Adunay mga tukmang lugar nga kabutangan sa poster ug uban pang campaign paraphernalia, apan wa' pa gani magsugod ang kampanya, nakabalandra na ang ilang mga dagway. Nahibawo na silang daan nga adunay tukmang petsa alang sa pagsugod sa kampanya, apan layo pa gani, gisugdan na ang pagpalapad sa ilang papel ug dungog. Nahibawo na silang daan nga dili sakto ang pagpalit og boto sa mga botante apan di' kompleto ang piniliay sa nasud kung wala ang pagpanglupad sa salapi.
Ang maong batasan giisip nang normal sa sagad nato. Apan kung imong tan-awon, pagtraydor gihapon sa balaod, sa pagkatawo ug sa ilang kaugalingon ang ilang gibuhat. Hangtud kanus-a ba makat-on ang tanan, nga gilansang ug gipasakit ang Ginoo tungod sa pagtraydor, di' lang ni Hudas apan sa daghang mga tawo nga nidayeg ug ni-abiba ni Kristo apan sa kauwahian susamang mga tawo ang nisinggit nga ilansang siya sa krus. Ang mga saad lang daan sa mga politiko atol sa kampanya apan di' mahatagan og katumanan sa kauwahian, maoy klaro nga timailhan sa pagtraydor sa matag usa kanato nagpuyo ning nasura.
- Latest
- Trending
