Kawat koryente

Angay’ng tinud-on gayod pagsilot sa kagamhanan kining mga tawo nga kawatan og koryente. Tiaw mo, nasakpan kagahapon sa mga sakop sa market operations division ang usa ka operator og game computers nga illegal nga nagkuha og koryente sa linya sa dakbayan.

Didto kini masakpi sa merkado sa Taboan. Maayo na lang kay nag-inantigo ang mga sakop ni market administrator Raquel Arce nga maoy nakasakop sa illegal nga kalihukan sa computer operator nga si Eugenia Dosdos.

Sa pagsukit-sukit kanila ni treasurer Oliva, si Dosdos nga giubanan sa iyang mga anak misuway pa pagpangatarungan nga wala sila masayod nga illegal connection ba diay ang linya nga gikuhaan nila’g suplay sa koryente.

Pastilan, tell that to the dead marines. Nagbayad pa kuno sila og tag P200 ang kinsena ngadto sa usa ka Nanding alang sa operation sa upat nila ka game computers nga gihurot pagsakmit sa mga personnel sa treasurers office.

Sayonan ka nga nag-anam g’yod pagsaka ang bayranan sa koryente sa Taboan public market mao nga nagduda na si market administrator Arce. Kaniadtong Enero 2009, ang bayranan sa koryente sa Taboan public market miabot lang og P26,521.

Apan nag-anam kini’g saka hangtud nga sa miaging Enero karong tuiga ang bayranan miabot na og P41,636. Pagkasunod buwan ang bayranan mikatkat pa g’yod ngadto sa P43,227.

Pag-adto nilang Arce sa Taboan public market kagahapon, gipawong nila ang “main” nga plangka ug nakurat sila kay gawas nga dunay illegal connections sa linya nila sa koryente, duna pa g’yoy nangawat og koryente posible dirikta sa poste.

Nasakpan nila nga dunay illegal connections, posible direkta gikan sa poste kay, bisan og gipawong na ang plangka naniga ra man gihapon ang suga sa ubang mga stalls.

Pastilan, ayaw g’yod mo pangawat og koryente. Tan-awa kadto si Dosdos, pamultahon siya og tag P5,000 sa matag game computers niya nga nasakmit kay gikonektar sa linya sa merkado nga walay pananghid.

Wala man god tuguti ang pagkonektar og mga appliances sa mga linya sa koryente diha sa kamerkadohan. Nasayod hinoon kita nga wala kaayo kini maestrikto sa pagpatuman.

Gawas sa multa, mas maayo g’yod nga pabayron si Dosdos sa excess sa koryente nga nahimo tungod sa illegal connection.

* * *

Apan ang grabe g’yod nga posibleng binuang nga maayong tan-awon sa mga opisyal mao kining kalihukan nga dunay mga tawo nga mokonektar og koryente sa mga ambulant vendors diha sa mga karsada sa Carbon panahon sa gabii.

Si city treasurer Ofelia Oliva nagtoo g’yod nga ang maong koryente nga gisuplay sa maong mga tawo ngadto sa mga tindera sa Carbon gikan ra sa mga poste. Kinsay maalkanse kun kini tinuod? Dili ba kita ra nga mga tawo?

Ang Visayan Electric Company mopasa sa maong alkanse nila pinaagi sa gitawag og systems loss. Dili ba kamo magpakabana niini? Akong lauman nga unta ang mga opisyal sa City Hall motan-aw niining maong isyu.

Kun tinuod man nga kining mga tawo nga nagsuplay og mga suga sa mga tindera sa Carbon nangawat ra diay og koryente gikan sa poste, angay sila nga dakpon og silotan.