Resign na lang mayor

Maayo tingali nga dili na botahan sa taga Talisay si Mayor Socrates Fernandez atul sa eleksyon karong Mayo 10 kay usa kini sa paagi nga maputol na ang pagpangabuso sa iyang anak nga si Joavan.

Kun maminaw ka sa balita, mahuna-huna nimo nga pwerteng malditoha na g’yod kaayo ni Joavan kay kanunay lang kini nga malambigit og mga kontrobersyal nga isyu, sama sa pagpamun-og ug pagpanghulga.

Makaingon ko nga talawan ra kaayo ang taga dakbayan sa Talisay nga wala g’yoy nakasukol aning Joavan. Nahisama na hinoon si Joavan karon niadtong sakop sa banay’ng Aznar nga kaniadto pirmi usab nga malambigit og kontrobersyal nga isyu.

Kun anhi tingali sa dakbayan sa Sugbo maghimo og minaldito nga kalihukan si Joavan, tan-aw nako dali ra siya nga mahalin. Pastilan, bisan ang mga polis diha sa Talisay nahimong talawan kun si Joavan na ang malambigit.

Sukli ra god ninyo na si Joavan. Kini maoy kuhai ninyo og basihanan nga walay tawo nga mohimo og pagpanaug-daug kun walay magpadaug-daug. Mao kana ang akong gibarugan kanunay.

Dili ko abusado nga pagkatawo, mahigalaon ko niadtong mga maayo, apan dili usab ko magpadaug-daug. Resulta, walay midaug-daug nako.

Sa kaso ni Joavan, daghan siya og gipanghulga. Ang labing uwahi nga hitabo naglambigit na usab og “gasoline boy” kay midumili pagtubil ni Joavan og gasolina kay wala kini pagtugot sa amahan niini nga mayor.

Diha na gitubilan nila’g gasolina pagtawag sa mayor nga nagtugot nga pahatagan na lang og gasolina ang iyang anak.

Kadto usab nga mga tulo ka semana na ang nakalabay, nalambigit usab og vehicular accident si Joavan diin giingnan pa niya ang mga biktima nga anak siya sa mayor.

Ngano man diay og anak siya sa mayor? Tan-awa ra god si Miguel Osmeña, ang anak ni Mayor Tomas Osmeña dinhi sa dakbayan sa Sugbo, naghimo ba god og sama sa iyang gihimo?

Ang mga anak sa ubang mayor, naghimo ba og minaldito nga kalihukan? Mora’g wala man tingali. Akong hangyoon kini si Joavan nga kalma lang Do. Sayod ko nga buotan ka man tingali, apan kuwang pa lang g’yod ang mga tambag ni “Brod Soc.”

Mao kini ang daku kaayo nga “failure” ni Brod Soc sa iyang kinabuhi. Usa siya ka banggiitan nga magwawali, apan pakyas siya paghatag og maayong wali sa iyang anak.

Tan-aw nako, kun dili na mayor si Brod Soc, tingali maminus-minus na ang pagpanghambog aning Joavan.

* * *

Paggawas nako sa karsada gikan sa among pinuy-anan kaniadtong Huwebes sa buntag, gidam-agan ang akong sakyanan og motorsiklo nga kusog kaayong nagdagan.

Bisan og naghunong na ko sa tunga sa karsada mikuli-ot g’yod ang motor nga misugat ug buot nga adto na moagi sa pikas “lane” sa karsada, resulta nasangit g’yod sa “dong” sa akong sakyanan.

Kay naghunong man ko niadtong higayona, natan-aw g’yod nako nga milupad ang drayber human mabuwag sa gisakyan niyang motor. Wala g’yod maunsa ang motor kay ang nakaigo sa akong sakyanan mao man ang “solid” nga “tinidor” sa motor.

Ang problema sa drayber nga taga barangay Busay kay wala siya’y lisensya. Mao kini ang rason nga wala siya’y kalibutan unsay tukma nga pagmaneho og sakyanan.

Angay ninyo nga mahibaw-an nga ang pagmaneho og sakyanan dili “rights” kon katungod sa usa ka tawo, kun dili gihatag lang kini nga pribilihiyo sa kagamhanan ngadto sa mga tawo nga makalukat og driver’s license.

Sa maong aksidente, ang drayber maoy magbagood pagtubag sa iyang obligasyon kay ang insurance dili man mobayad kay ang sakyanan gimaneho man og tawo nga dili lisensyado.

Resulta, bayran niya ang kadaut gikan sa iyang bulsa. Unya P2,500 nga multa sa pagmaneho og sakyanan nga walay lisensya.