Pinangga gyud

Gitunod na sa iyang katapusang kapahulayan si Press Secretary Cerge Remonde kagahapon sa hapon bawon ang pagmahal ug paghigugma sa iyang mga higala ug kauban sa trabaho.

Sa iyang paglubong nasaksihan sa mga sakop sa media giunsa pagmahal ug pagpangga si Remonde sa iyang lungsod nga natawhan. Libo-an ka mga Argawanon pinanguluhan ni Mayor Edsel Galeos ang miduyog sa pamilya ni Remonde paghatud sa lubong.

Apan ang dakong timailhan kun unsa siya ka pinangga dili

lang sa iyang lungsod kon dili lakip na sa tibuok nasud mao ang presensiya sa duha ka labing taas nga opisyal sa Pilipinas.

Si Presidente Gloria Macapagal Arroyo ug Bise Presidente

Noli De Castro mitambong gyud sa lubong ni Remonde bisan kun kini didto lang himoa sa usa ka gamay ug pobreng sam-ang pampubliko sa Argao.

Gawas nilang Arroyo ug De Castro didto sab ang daghang mga local nga mga opisyal nga mga higala ni Remonde. Laing pasidungog sab ang iyang naangkon bisan sa iyang kamatayon human ang armadong kusog sa nasud mi-confer kaniya sa ranggo nga Lt. Col. sa reserve force sa AFP.

Ang hepe mismo sa AFP nga si Chief of Staff Victor Ibrado maoy nangulo sa conferment rites didto sa Diosdado Macapagal Sports and Cultural Center, ang proyekto nga iyang gihimo alang sa Argao.

Samtang gikalipay kaayo sa mga miyembro sa pamilya ni Remonde ang pagtabang ug pag-atiman sa kagamhanan alang sa ingrande nga pagpahiluna sa iyang patay’ng lawas, apan di kalikayan ang kahiubos sa uban tungod kay daw sa giilog na gikan nila ang katungod.

Usa sa mga miyembro sa banay wa gyu’ng kapugong diriyot gyud ika-ingkwentro sa usa sa mga opisyal sa Office of the Press Secretary nga nadistino dinhi sa Sugbo tungod kay bastos ug hari-hari-on man sab gud ang maong opisyal.

Bastos tungod kay kuhaan naman hinuon niya sa katungod ang usa sa mga igsuon ug iya pang gisinghagan. Nakalimot ang maong tiguwang nga opisyal nga dili siya maoy namatyan kon dili ang pamilya ni Remonde.

* * *

Dihang gisugdan ni Kongresista Nerissa Soon Ruiz ang iyang proyekto diha sa R. Colina Street gibabagan ni ni Mayor Jonas Cortes tungod kay kuno bag-o niyang giayo ang drainage niini.

Karon nga miuyon na si Ruiz nga mosibog nalang sa laing bahin sa karsada giguba ni Cortes ang drainage nga ilang bag-ong nahuman tungod kay giilisan og dagko nga culvert.

Unsa man ni’ng iyang gihimo pag-usik-usik sa kwarta sa gobiyerno? Nganong giguba man ang proyekto nga bag-ong nahuman aron padak-an?

Nganong wa naman lang ilargo og dako ang culvert nga gitaod aron ma-usa ang gasto ug malikayan ang dugang kahasol sa mga motorista?

* * *

[email protected]