Matapat na lider

Sa ngayon ang ating mapanghahawakan

para tumahimik itong ating bayan –

Ay ang nalalapit – pambansang halalan

at tayo’y pipili ng lider na tunay!

Mula sa Pangulo haggang sa konsehal –

Ihahalal nati’y taong mararangal;

Hindi mag-iimbot, mga walang sungay

malinis ang budhi at ang puso’y banal!

Pero sa ngayon ba’y may taong ganito

ang iniisip lang bansas’y umasenso?

Mayama’t mahirap hahanguin tayo

sa kinasadlakang hirap at siphayo?

Kabuhayan natin ay bagsak na bagsak

ang mapera lamang ang namamayagpag;

Tingnan mo ang ating mga nagsasalat –

tahanan ay giba sa kalye’y nagkalat!

Malalaking building nakikita natin –

para bang sagana tayo sa pagkain;

sa likod ng mga gusaling maningning

doo’y nakahanay tahanang madilim!

Hindi lang madilim kundi mabaho pa

pagka’t sa estero sila nakatira;

Ang sitwasyong ito kung magbago sana

magiging tahimik itong buong bansa!

Mga magnanakaw at mga salarin

maglalahong ganap sa paligid natin;

Magiging payapa ang ating damdamin

matutulog tayong masaya’t mahimbing!

Kung ang mga lider magiging matapat

sa mga kaaway makikipag-usap–

Militar at pulis hindi tinatawag

pagka’t sila mismo ay handang humarap!

Kaguluha’t gyera sa buong Mindanao

dapat payapain ng mabuting halal;

Sila’y magsasadya sa magulong lugar

at papayapain lahat ng alitan!