Reklamo batok sa GSIS

Kini nga Ahensya sa Gobyerno mora og duna'y daghang mga pasangil. Ako usa sa mga pensyonado ug akong naobserbahan nga motumaw lang ang mga hinungdan ngano nga ang mga pensiyonado dili makakobra sa ilang pension sa hustong panahon kay mag usab-usab ang petsa. Unya na kini makakobra og moabot na ang panahon nga gitakda sa maong Ahensya sa Gobyerno nga wala man lang magpahibalo sa mga pensyonado.

Sa una dugay pahibawo nga sa matag petsa uno sa sunod buwan pwede na makakobra sa pension sa miaging buwan. Maayo to kay pagka petsa uno sa sunod buwan, ipaslak ang ATM Card sa ATM machine lugsot dayon ang pension sa miaging buwan. Naunsa man nga sa nadugay-dugay na tingali adtong tuig 2007, dunay pahibawo gikan sa GSIS nga ang among pagkobra sa miaging buwan adto na sa petsa otso (8) sa sunod buwan kay kuno dunay ayohunon sa makina.

Adtong unang semana sa Septembre, 2009, duna na usab pahibawo sa GSIS nga gipaagi sa text message nga nagkanayon: "Due to the Cleansing of Records, ur pension for this month will be credited on or before September 23, 2009. Sorry for the inconvenience. Thank you for bearing with us." Mao ni ang text message nga akong nadawat sa among Ahensya sa Gobyerno nga hasta karon wa pa gyud ni nako papasa sa akong cellphone.

Ug tinuod man galing nga maglimpyo sa mga records, unsa man diay mga buhat sa mga personahe nga anaa sa record section nga sa adlaw nga tingtrabaho nagreport man tingali na sila. Ug asa man diay gibutang kanang mga records, sa suok o sa daplin mao kaha nga gi-agop-opan na ug wala sa filing cabinets? Ngano man wala nay kwarta nga ikapalit og filing cabinets? Syaro sad intawon no!

Unya kadtong duna kuno'y ayohunon sa makina, ug karon maglimpyo sa records ngano man, kada buwan ba diay mag-ayo sa makina ug maglimpyo sa records nga wala man ibalik sa petsa sa una nga petsa uno sa sunod buwan makobra ang pension? Kini kamo lang taga Ahensya sa Gobyerno makatubag niining mga pangutanaha. Tungod niini mora ug matawo sa matag hunahuna sa mga pensiyonado ang pagduda ug hinaut unta nga ang mismong responsable makonsyensya.

Pastilan, imbes motabang sa mga pensiyonado nga tiguwang na ug ang uban lugos na gani makabangon sa ilang higdaanan tungod sa sakit ug wa na ikapalit og tambal para maintenance sa panglawas, mamatay na lang hinoon.

Kamo karon nga personahe/empleyado dili mobati niini nga kahimtang kay baskog pa man mo. Pero matagamtam ra ni ninyo og moabot ang inyong panahon. Dunay kasingkasing apan wa matawo ug molambo ang hiyas sa pagbati ug kaluoy ug way paglantaw o pagpanamin sa ilang kaugalingon kun moabot na ang ilang panahon sama kanamo karon.