Ang kaanindot sa pagkabata

Usa sa mga maanindot nga talan-awon matag saulog nato sa Piyesta Senyor mao ang mga bata nga dala-dalahon sa ilang mga ginikanan aron manimba o dili ba kaha manuroy. Ang usa ka bata simbolo sa hiyas sa Santo Niño nga atong gisimba ug giludhan matag higayon sama niini. Niila kita sa iyang pagkagamhanan, nag-ampo kita Kaniya ang bato balani sa gugma. Akong nakita nga yano lamang ang panginahanglan sa usa ka bata ug dili sama natong mga dagko nga magkadugay magkakomplikado ang kinabuhi. Dili sama natong mga dagko nga bata-bataon apan dili bata kay wala man kita makatubo aron mamahimong tarong ug mapuslanon. Adunay pipila nato nga kusog kaayong magpabuhi ug dili man maantigong mobakyaw sa mga kamot aron maningkamot. Ang Piyesta Senyor maoy magtukmod unta kanato sa pagtinguha labina sa mga ginikanan nga mamahimong magbalantay ug tig-atiman sa mga kabataan.Kun tinud-anay kitang nagdebosyon sa Mahal nga Senyor nan, atong sundon ang Iyang hiyas ug atong higugmaon ang kabataan.