Kawani nga tapolan

Nindot baya ang pagsud-ong og “fireworks display” ingon man ganahan usab ko nga magtan-aw sa tag-as nga judas belt nga pabuto kun kini duslitan, apan ikatulo na karon ka Pasko nga wala na ko niini.

Naglikay man god ko sa aso gikan sa pabuto tungod kay kaniadtong Bag-ong Tuig 2003, didto tawon ko nagbag-ong tuig sa ospital. Naapektahan ko sa daghang aso nga akong nahanggap gikan sa pabuto.

Gitug-anan ko sa doktor nga grabe diay kaayo og epekto sa imong ginhawaan kun makahanggap ka og daghang aso nga gikan sa mga pabuto.

Busa kamo diha, mentras may higayon pa sa paglikay, ayaw kaayo paapopa sa grabeng aso gikan sa mga pabuto.

Swerte tingali mi og gamay diri sa bukid kay minus-minus man og aso kun itandi diha sa kinapusorang bahin sa dakbayan.

Diri sa among dapit, malingaw lang intawon ko pagsud-ong sa fireworks display sa Marco Polo Plaza Hotel. Busgon lang nako ang akong mga mata pagtinan-aw sa mabulokong fireworks display.

* * *

Angay’ng susihon dayon sa kabomberohan kun maayo ba ang kondisyon sa ilang mga fire trucks karong panahona.

Kini aron mapangandaman kun dunay sunog. Kuyaw kun masundan ang nahitabo sa Boljoon nga dihang nasunog ang higante nila nga Christmas tree kaniadtong miaging gabii, wala magamit ang ilang fire truck kay guba.

Dili man god imposible nga moulbo ang sunog tungod sa mga pabuto karong panahona.

* * *

Misuroy ko sa downtown area kaniadtong miaging gabii, paita, hapit dili ko makaagi nga nagbitbit sa akong pinalit kay daghan kaayo nga naninda bisan diha na sa agianan sa mga tawo.

Takulahaw lang nga misantop sa akong kaisipan ang dagway ni Major Vicente Mercado, ang hepe sa Squatters Prevention Encroachment Elimination Division (SPEED).

Usa kini sa departamento sa City Hall nga wala’y klarong trabaho. Tingali, kini si Mercado kun mosuroy diha sa downtown area magpiyong ra sa iyang mata aron dili siya mauwaw sa kapakyas pagtuman sa iyang trabaho.

Kun ako’y hepe ug sakop sa SPEED, ikauwaw kaayo nako ang talan-awon sa aseras nga ang mga tawo nga maglakaw halos dili na makaagi.

Nahibaw-an nako nga miretiro na man unta kini si Mercado apan ambot og ngano nga nagpabilin pa man sa katungdanan. Ngano, midayeg ba sila si Mayor Tomas Osmeña ug Vice Mayor Michael Rama sa iyang serbisyo?

* * *

Atensyon, mga tinugyanan sa Department of Engineering and Public Works (DEPW) nga gidumala ni Engr. Nicomedes Leonor. Tabuni tawon nang lawom kaayong lungag sa karsada nga anaa sa Pelaez Street duol sa eskena Colon.

May lain usab nga lungag nga wala g’yod ninyo tagda diha sa eskena Lapulapu ug Zamora Streets, kanang duol sa barangay sports complex sa barangay San Roque Ciudad.

Gireport na nako kini ngadto ni Mayor Osmeña, apan ayaw na tingali huwata nga mandoan pa kamo sa mayor. Aw naa pay usa ka laing lawom nga lungag diha sa Manalili Street, atubangan sa kanhi Victoria Hotel.

Syaro na man usab, nakakita man gani ko niining maong mga angayang tagdon, kamo pa kaha nga inyo man kining trabaho? Unsa may inyo, ang pagkobra lang sa inyong sweldo?

Pagka wala’y nada ninyo nga mga empleyado sa gobyierno.