Huwag sanang maulit ngayong 2010

Ngayong taong ito anong mangyayari

Sa loob ng bansang maipagkakapuri?

Sana’y huwag namang matulad sa dati

Na tayo’y alipin ng dusa’t pighati!

Sa daraang taon tayo ay nalugmok

Sa delubyong baha na nagmukhang salot;

Ang damdamin nati’y sinaklot ng takot

Tahanan at buhay – mistulang alabok!

Lumubog sa baha ang buong paligid

Dahil sa marumi ang ating daigdig;

Ang mga imburnal, lagusan ng tubig

Barado ng bahay, basura at putik!

At dahil sa naging burara ang bayan

Kaya ang nangyari – Inang Kalikasan –

Sa utos ng langit ay kumilos naman

Ito ang naglinis sa bukid at bayan!

Pinakamasaklap nang nagdaang taon

Mga Pilipino ay naging simaron;

Armadong lalaki’y humarang sa convoy

At pinagbabaril taong nangaroon!

Tao at sasakya’y nawalan ng buhay –

Sila ay marami at hindi iilan;

Ito ay malaking katampalasanang

Sa historya nati’y di malilimutan!

Baha at pagpatay ay kapwa naganap

Nang nagdaang taon na taong lumipas;

At sa taong 2010 na darating bukas

Huwag sanang maulit ang bansa’y mawasak!

Sa taong darating kung walang ganito

Ngayon lang gaganda Buhay-Pilipino;

Huwag din mangyaring sa eleks’yon dito

Ay mayro’ong dayaan at saka magulo!

Ang sitwasyong ito kung masusunod lang

Tayong mga Pinoy lalong hahangaan:

Bantog na nga tayo sa ating si Pacquiao

At Penaflorida’ng bida sa aralan!