Challenge the changes

Taliwa sa iyang ka-busy, isip Chief of Staff sa buhatan ni Rep. Jun Alcover sa party-list ug pagka-presidente sa AFRENA 7 kon Association of Former Regional Executives of National Agencies in Region 7, si kanhi Customs Collector Boy Odilao, nagpadala na usab og mga panultihon nga sa akong hunahuna maayong ikapaambit kaninyo.

Giingon dinhi nga “Change is the nature of life. But challenge is the way of life. So you have to challenge the changes, not change the challenges.” Tinuod, daghan kanato, labi na ang atong mga lider, kanunay’ng nagpabati sa ilang tinguha paghimo’g kausaban sa atong nasud.

Apan kutob ra sila sa mga speeches ug mga press releases. Maoy hinungdan nga hangtud karon, padayon ang atong pangandoy nga makahimo kita’g kausaban sa atong kinabuhi.

Lisud pag-achieve og tiunay nga change, labi na’g makabalda kini sa personal natong mga ambisyon ug maoy mohari ang pagpahigayon sa kaugalingon inay bayan muna. Ang mahitabo, inay i-challenge nato ang mga changes, ato na hinoong usbon ang mga challenges.

Nia pa: “All things in life are temporary. If they’re going well, enjoy them. They won’t last forever. If they go wrong, don’t worry, they can’t last long either. What’s nice about life is that each day is never like the other.”

Nindot. Temporary ra gyud ang tanan ning kalibutan. Apan, daghan kanato ang nagpuyo ning temporaryong kalibutan, as if walay kamatayon. Magkadusingot pag-ayo, ang uban magpabaga sa nawong, aron maangkon ang kalibutan, ambut unsaon niya ang kalibutan nga both siya ug ang kalibutan, matun-as man. Ang uban di gustong mohawa sa gahom. Ambut ngano.

Enjoy life. Ug di kinahanglan mangawat ang tawo aron maka-enjoy sa life. Di kinahanglan nga mo-lie, cheat ug steal ang tawo, aron kapahimulos ning kinabuhi. Kun ma-wrong kita, wala’y angay kabalak-an, tungod kay molabay lang usab kini sama sa mga right nga atong nahimo.

Sa giingon dinhi, ang nakanindot ning kinabuhi, kay ang matag adlaw dili sama sa nanglabay’ng mga adlaw. Sa ato pa, matag adlaw aduna kita’y higayon pag-right sa mga wrong nga atong nahimo. Hinoon, usahay god, nindot man kaayo ang paghimo’g mga wrong kay dali kitang makasapi og daghan. Di ba, Dro?