EDITORYAL - Pilion pag-ayo ang kandidato

Midagsa sa Comelec ang mga kandidato sa nagkadaiyang puwesto sa lokal ug nasyonal nga kagamhanan.

Daghan ang mipakita’g dakong kursonadang mosilbe sa katawhan.

Anaa na karon sa kamot sa katawhan ang kahigayonan sa paghatag kausaban sa kahimtang sa atong gobiyerno.

Daghan ang kapilian sa mga kandidato nga misaad nga mohatag kanato’g maayong pangagamhanan. Apan angay tang hatagan og seryosong pagpili — pagpili nga sa atong hunahuna mapatigbabaw ang kaayohan sa katilingban.

Ato na untang wad-on ang nahimo nang tradisyon natong pamolitika nga kadtong kuwartahan ug gamhanan nang daan maoy pilion bisan dili maoy gikinahanglan ning panahona.