Andam na ba ang Comelec?

CAGAYAN DE ORO CITY – Nagkapuliki g’yod tawon pagpanubag ang demonstration coordinator sa Smartmatic TIM nga si Miguel Avila dihang gihan-okan siya og nagpusot-pusot nga mga pangutana gikan sa mga journalists nga mitambong sa seminar diri sa Pearlmont Hotel.

Duna g’yoy mga punto nga wala g’yod kahatagi og tubag sa mga opisyal sa Smartmatic TIM ug sa Commission on Elections (Comelec) kun unsay ilang pagpangandam sa mga problema nga motumaw unya atol sa adlaw sa eleksyon karong Mayo 10, 2010 kun gamiton na ang mga Precinct Count Optical System.

Ang Smartmatic TIM maoy supplier sa mga Precinct Count Optical System nga gamiton sa Comelec aron kuno paspas ang pag-ihap sa mga botos alang sa mga kandidato ug mahibaw-an dayon ang mananaug pipila ka oras lang human sa pagbotar.

Atol pa lang gani sa unang adlaw sa seminar nga gipasiugdahan sa Philippine Press Institute, daghan na kaayong mga pangutana gikan sa masukit-sukiton kaayong mga journalists nga daw sa nakapatuk-an ni Miguel Avila, ang coordinator sa Smartmatic TIM.

Kay ang mga ballot scanners dili man kuno mobasa og mga balota nga “fake,” sama sa photo copy ballots, ug mga hinimo nga walay barcodes sa Comelec, ako nga gipangutana si Avila kun sa “test count” nga himoon nila sa dili pa sugdan ang eleksyon mga tinuod ba diay nga balota.

Wala makatubag niining maong punto si Avila. Basi god sa bag-ong pamaagi sa Comelec, pananglit sa usa ka clustered precinct dunay 1,000 ka botante, ang maong presento gahinan lang og 1,006 ka balota, ang unom para sa mga sakop sa Board of Election Inspectors gitugotan nga anha ra mobotar sa presento diin sila madistino.

Ang akong pangutana, orihinal ba nga balota ang ilang gamiton? Duna diay sila’y extra ballots nga gamitonon para sa paghimo’g test or mock election aron pagsuta sa “accuracy” sa scanners?

Kay kun fake ballots ang ilang gamiton dili man kuno mobasa ang machine og mga fake ballots.

Si James Jimenez nga maoy tigpamaba sa Comelec maoy mipatin-aw nga orihinal g’yod kuno nga balota ang ilang gamiton. Unsaon nila pagkontrolar nga dili kini magamit sa binuang?

Gikuyawan ko nga kini maoy gamiton nga rason sa mga madudahon kaayong politiko nga mangapilde.

Ako usab nga gipangutana si Jimenez nga kun human sa pagbotar, unya mentras dili pa ma-transmit ang results sa election ngadto sa mga city o municipal board of canvassers, dayon may moabot nga armadong mga tawo ug sakmiton ang ballot box unya sunogon ang machine ug mga balota, ideklarar ba nga failure of election?

Wala kaayo makatubag si Jimenez niining maong punto ug miingon lang nga “posible” nga ang Comelec en-banc modeklarar og failure of election, apan walay klaro.

Pastilan, paminaw nako pwerteng daghana g’yod sa problema unya atol sa adlaw sa eleksyon.

Usa ka pangutana. Pananglit dunay abtik nga kandidato ug magpundok siya og mga 300 ka supporters nga sayo niya kaayong paadtoon sa presento, maglinya daan, unya inigbotar nila maglangan-langan aron nga moabot na lang alas sayes sa gabii, sila ra ang makabotar.

Sa ato pa, sirohan sa botos ang kontra nila nga kandidato. Dili ba posible? Wala sila’y klarong tubag kun mapugos ba nila ang usa ka botante nga mopaspas sa pagbotar nga papahawaon kun maglangay-langay?