EDITORYAL - Daan pa lagi mi

Ang pag-uyon sa National Economic Development Authority (NEDA) sa giplanohang Cebu Light Rail Transit (LRT) maoy tema sa atong editoryal di pa lang dugay.

Matud sa NEDA magkinahanglan una sa pag-uyon sa tulo ka mayor sa tulo ka siyudad nga nalambigit sa proyekto usa kini ma-implementar.

Ug miingon kita sa maong editoryal nga dili masayon ang pagkuha sa approval sa mga mayor. Labi na ang pag-uyon ni Cebu City Mayor Tomas Osmeña kinsa walay maayong relasyon ug si 1st district Rep. Eddie Gullas nga maoy prime mover sa LRT project.

Ug mao gyu’y nahitabo. Klarong miingon si Tomas nga wala siya ganahi sa LRT ug ang iyang gipaboran mao ang iyang BRT kon Bus Rapid Transit system.

Karon quo vadis, LRT? Matud pa ni 2nd district Rep. Pablo Garcia, ang oposisyon ni Osmeña maoy “nail in the coffin” sa proyekto. Lansang kuno sa lungon sa proyekto.   Ni Juanito V. Jabat