Laing monumento sa pangurakot

Ang mga sakop sa oposisyon mibulgar sa giingong overpricing sa mga basketball board nga giapud-apod ngadto sa kabarangayan sa amihanang distrito sa dakbayan gikan sa pork barel ni Kongresista Raul del Mar. 

Basi sa mga dokumento nga nahipos sa grupo nila ni Kapitan Mary Ann delos Santos ug Jonathan Guardo mokabat og kapin sa P11 mil ang matag board nga gipamalit sa dakbayan wa pa ni labot sa lighted panaflex sign nga nagdala sa mga pulong "serbisyo del mar".

Ang Department of Engineering and Public Works nga maoy gitahasan sa pagpanghatag sa mga basketball boards miingon nga way overpricing nga nahitabo.

Basi sa kwentada nga gihatag sa DEPW igo ra ang kapin sa P11 mil nga kantidad tungod kay apil sa kwenta ang plywood ug pental.

Pastilan ka baga gyud og nawong bisan og labihan na ka klaro sa pagpaburot sa presyo mopalusot pa gyud.

Unsa may pagtuo sa taga DEPW ignorante ang mga Sugboanon nga wa mahibawo pilay presyo sa plywood ug pintal?

Ang usa ka pligo nga plywood ang labing mahal kapin sa usa ka libo ka pisos unya duha ka board ang mahimo niini.

Samtang ang enamel nga pintal bag-o pa ko nipalit P400 ngadto sa P600 ang presyo.

Giunsa man pag-abot og P11 mil ang matag basketball board?

Laing surambaw sa maong proyekto tungod kay ang giingon nga supplier wa diay malambigit sa pagpamaligya og basketball board ug panaflex.

Sigun sa kasayuran nga akong nahipos daw sa gigamit ra ang resibo tungod kay gikatahong nakit-an nga ang mga panaflex sign diha ra buhata sa kilid-kilid.

Dili ni unang higayon nga ang pundo gikan sa pork barel ni Del Mar gigamit sa kwestiyonable nga proyekto.

Pipila ka tuig na ang milabay gigamit sab ang pundo gikan ni Del Mar pagpamalit og mga overprice nga computers alang sa kabarangayan.

Kun limpiyo ang mga kamot ni Del Mar sa maong anomaliya angayang siya maoy mangunay pagkiha sa mga tawo nga iyang gitugyanan sa kwarta pagpatuman sa maong proyekto.

Angayang ipakita ni Del Mar sa publiko nga tinud-anay siya sa panawagan nga imbistigahon pinaagi sa pagpangunay mismo og pasaka og kaso batok sa mga opisyal sa DEPW.

Sa ingon niini motoo ang katawhan nga wa gyud siya'y kasayuran sa pagwaldas sa pundo sa katawhan.

* * *

[email protected]