Grabeha uy!

Dunay tinguha karon nga tukoron diha sa barangay Inayawan ang usa ka buwangan nga kun wala ko masayop ang manag-iya niini suod ra kaayo sa barangay kapitan nga si Rustico “Rustom” Ignacio.

Tinuod, may posibilidad nga matinuod ang giingon sa usa ka konsehal sa Inayawan nga basin og ang pagtukod og buwangan sa maong dapit, basin og kini maoy makatabang nga maminus ang tigbakay sa Inayawan ug kasikbit nga lugar.

Matud ni Rafael Christopher Yap, ang handling legal officer sa City Attorneys Office nga ang balaud naghatag og katungod ngadto sa mga local government units nga maka-regulate ug paghatag og lisensya sa mga buwangan sa ilang dapit.

Nabali lang hinuon ang balaud nga gikutlo ni Atty. Yap kay ang nagmugna sa Local Government Code mao ang Republic Act 7160, dili Republic Act 7610 nga balaud para sa mga bata.

Husto si Atty. Yap, ang lagda sa Local Government Code wala mag-amendar sa lagda nga gilatid sa Cockfighting Law of 1974 nga nagtugot lang og usa ka buwangan sa matag dakbayan ug lungsod.

Hinoon, gilatid nga kadtong mga dakbayan ug lungsod nga ang populasyon subra sa 100,000 mahimong makabutang og duha ka buwangan. Wala ilatid diha sa maong balaud nga mahimong tuloon ang buwangan.

Karon, dinhi sa dakbayan ang akong nahibaw-an nga dunay buwangan diha sa Sawang Calero, unya duna sa’y buwangan nga anaa sa Banawa. Dili ba duha na man ang buwangan dinhi? Mahimo diay na?

Ang ubang konsehal, sama ni Konsehal Arsenio Pacana, nabalaka nga basin og ang pagmugna og buwangan diha sa Inayawan makadaut kini sa morale sa kabataan nga anaa nagpuyo sa Inawayan.

Mao diay nga wala usab mosupak sa pagtukod og buwangan sa Inayawan si Kapitan Rustico Ignacio kay ang tag-iya sa pagatukoron nga buwangan kun kahatagan og prangkisa sa dakbayan mao man ang usa ka Lutherlee Ignacio Soon.

Ambot ig-unsa kaha sa kapitan kini si Lutherlee. Ang ako lang punto mao nga ang Cockfighting Law god wala man mag-ingon nga mahimong tulo ka buwangan ang tukoron sa usa ka dakbayan.

* * *

Kataw-anan kaayo ang kwentada nga gihimo ni Cebu City district engineer Nicomedes Leonor nga nagsuway pag-justify sa gasto kun nganong ang usa ka basketball board nga gipalit nila gikan sa budget ni Kongresista Raul del Mar mogasto og P11,194.

Grabeha sab sa imong presyo engineer uy. Tiaw mo nga ang usa ka basketball board kuno mogasto g’yod og entero ¾ nga plywood nga ang kantidad kuno P1,129. Di ba mahal ra?

Ang tinuod, ang usa ka plywood tungaon kana ug maoy himoong basketball board, dili entero g’yod nga plego.

Lain pa g’yod, matud ni Engr. Leonor nga ang usa ka basketball board mogasto kuno og tunga sa galon nga “flat wall” nga pintal, unya ang presyo P600. He! He! He! Grabeha nimo engineer uy!

Bag-o man ko nga nagpatukod og gamay’ng balay ug namalit man ko og susama nga pintal, ang flat wall nga enamel naa ra sa presyo nga P490 ngadto sa P550, depende sa brand.

Unya ang matag usa sa upat ka bolt ug roska nga gamiton sa pag-attach sa ring ngadto sa board, ang kantidad kuno tag P162.50. Kini ug daghan pa kaayo nga kwentada ni Engr. Leonor nga lisud katoohan.

Awhag nako ni Kongresista Del Mar nga moapil ka pag-awhag sa Ombudsman nga imbistigahon ug dalion paghuman ang imbistigasyon aron masilotan dayon kinsa ang mga nalambigit niini.

Karong Martes, sila si Lahug barangay captain Mary Ann delos Santos mopasaka na og kiha didto sa Ombudsman batok sa mga opisyal sa Cebu City district engineers office nga gipangulohan ni Leonor.