Opisina sab ni Bolo ang naghimo sa voucher
Nisamot na gyud ka tataw ang interest ni Bokal Juan Bolo sa kontrobersiyal nga Balili transaksiyon human masuta nga di lang kay siya ang nag-facilitate og nagpreparar sa memorandum of agreement kun dili ang iyang opisina sab ang naghimo sa obligation form ug voucher nga gibasihan sa pag-isyu sa tseke.
Kun tinuod ang pangangkon ni Bolo sa nanlabay nga mga hearing sa Adhoc committee sa Hunta Probinsiyal nga nag-imbistigar sa kontrobersiya nga igo lang siya nga mitanyag ngadto ni Gobernador Gwendolyn Garcia sa luna.
Matud ni Bolo nga ang broker nga si Lumen Durano mitanyag sa probinsiya sa 24.7 hektaryas nga Balili property. Matud ni Bolo nga siya maoy mipaabot ngadto sa gobernador sa tanyag ni Durano.
Siya sab maoy nangamahan sa resolution nga naghatag og authority sa gobernador pagpalit sa luna.Gawas niini matud ni Bolo nga wa na gyud siya'y laing partisipasyon sa maong transaksiyon.
Apan nasuta atol sa pagpadayon sa hearing sa Adhoc committee kagahapong adlawa nga ang mga staff ni Bolo maoy nagsige og follow-up sa voucher aron mapadali ang pag-isyu sa tseke.
Ang staff sa internal audit office sa Kapitolyo nga si Geraline Guba miingon nga ang mga staff ni Bolo maoy kanunay nga nag-follow-up sa voucher. Iyang gitumbok si Emerciano Sevillano ug si Clarissa Sususco nga maoy personal nga naghatud sa voucher ug sa obligation request.
Nasuta sab nga ang opisina diay ni Bolo maoy nag-preparar sa voucher ug sa obligation request. Kun wa gyuy laing interest si Bolo gawas sa pag-facilitate sa pagbaligya sa luna nganong ang iya mang opisina maoy nagpreparar sa voucher ug obligation request?
Kun mao ni’y standard practice nganong giyak-an man sa iyang mga staff ang pagsunod sa voucher? Dili kaha nga gisiguro ni Bolo ang pagdali sa payment tungod kay duna siya'y gipaabot nga komisyon?
Si Bolo hinuon misubli sa makadaghang higayon nga wa siya'y bisan usa ka dako nga nadawat isip komisyon sa maong transaksiyon. Apan kadudahan kaayo ang iyang papel tungod sa special interest nga iyang gipakita.
Kun wa siya'y komisyon nga giapas o bisan unsa nga interest sa transaksiyon nganong siya may nangusog ug nganong siya may nangamot sa tanang ang-ang sa transaksiyon.
Bisan og unsaon og lihay ni Bolo ang tanang ang-ang sa transaksiyon mobalik gyud paingon sa iyang opisina. Busa kun ako'y Bolo maayo tingali nga iyang itug-an ang tanan ug angkunon kinsay iyang kasabot.
* * *
- Latest
- Trending
