Unsa ba upod ning atong pangulo

Naputos karon sa mga pagsaway si Pangulong Gloria Macapagal Arroyo tungod sa hapit moabot sa usa ka milyon niining panihapon didto sa mahalong kan-anan sa Amerika. Kun tinuod ang balita 960,000 ka pesos ang nabayad sa mao lang panihapon. Kun kinsa ang nagbayad sa maong panihapon wa pay klaro kay makalibog ang tubag sa mga torotot sa pangulo.

 Sa una gipasabot ni press secretary Cerge Remonde nga bisan usa ka sentimo way gasto sa maong panihapon ang Malakanyang tungod kay si Kongresista Ferdinand Martin Romualdez sa Leyte ang mibayad niini. Apan giklaro ni Atty.Nikis Mali, tigpamaba sa kongresista nga dili kini ang mibayad kun dili ang igsoon sa kongresista nga usa ka enhenyero nga toa na nakabasi sa Amerika.

 Sa report ni Rey Pasaporte ning maong pamantalaan kaniadtong miaging Martes quoting Press Secretary Cerge Remonde giingon niini nga gikan sa kaugalingong bulsa ni Pangulong Arroyo ang gibayad sa mahalong panihapon. Gipangatarungan sa Press Secretary nga kuwartahan ang pangulo gani makita man ang kakuwartahan niini sa iyang Statement Of Assets and Liabilities and Networth busa makaabot kini sa paggasto sa maong kantidad. Unsa ba gayu’y tinuod ani. Ano ba talaga ang totoo Ate. Porbida, lipat-lipat.

 Ang ako lang ning Malakanyang nganong mamakak pa man? Nganong manglipat pa man? Nganong dili naman lang mosulti sa tinuod? Aduna ba ugoy angayang ipamakak sa maong isyu?

 Nasayod na ta nga ang New York sa Amerika usa sa mga dapit nga mahal ang mga palaliton busa di na nato ikatingala nga moabot gayod sa maong kantidad ang magasto sa pangulo. Ang kuwarta sa Amerika dolyar busa kwentahon nato sa dolyar ang gasto sa panihapon sa pangulo ug mga kaubanan.

 Ang nabayran sa nahisgutang panihapon 19,866 dolyares kun na Pilipinas pa ni 19,866 ka pesos lang ni. Para kanato dako na kaayo ang gasto sa panihapon kay gi-convert man ugod nato ang dolyar ngadto sa peso. Pero angayan natong huna-hunaon nga ang maong kantidad wa gastoa dinhi sa Pilipinas kun dili didto ni gastoa sa Amerika diin dolyar ang gigamit nga kuwarta.

 Ang pag-adto ni Pangulong Arroyo sa Amerika kabahin sa iyang gahom isip pangulo busa matawag nato kining usa ka official function ug kay usa ka official function di upod seguro nga makiangayon nga di nato siya pakan-on. Ug kun didto man siya mokaon sa mahalong kan-anan wa na tay mahimo ana kay pangulo man siya.

 Ang di lang maayo ning mga pagbiyahi ni Pangulong Arroyo ngadto sa laing kanasuran kanang kanunay niyang pagdala og usa ka batalyon nga mga sip-sip nga maoy nakadako sa iyang gasto. Kun gamay pa lang unta to ang kuyog sa pangulo, gamay ra unta silang nangaon ug gamay ra ang nabayran. Unsaon magdala man upod og usa ka batalyon nagsalig nga di siya’y mogasto.