Grabeha g'yod uy!

Nakapanglingo-lingo g’yod ko kagahapon pagkadungog sa balita nga misaka na usab ang presyo sa mga oil products.

Nasayod man god ko nga sa matag higayon nga dunay pagsaka sa presyo sa oil products, may epekto gayod kini sa tanang katawhan kay mosaka man usab ang kantidad sa atong mga palaliton.

Tiaw mo nga ang presyo sa matag litro sa gasolina gipaumentohan na usab og dos pesos, ug P1.50 sa matag litro sa krudo.

Maayo lang kining ubang opisyal sa atong kagamhanan kay dili man magtagad bisan tagpila pa ang usbaw sa presyo sa oil products kay ang gobyerno man ang mobayad sa ilang gasolina.

* * *

Human nako gipahibalo sa nangagi nakong lindog ang mga sakyanan sa kagamhanan nga posibleng gigamit sa personal, duna g’yoy uban nga mohatag na nako og inpormasyon.

Hinoon, dili nako ipublikar ang mga reports nga madawat nako pinaagi sa text messages kay posible man nga dunay magbinuang aron dauton ang kontra nila nga anaa sa kagamhanan.

Kun duna mo’y report, aria ko sa opisina unya kinahanglang pirmahan ninyo ang report aron may basihanan ko pananglit may imbistigasyon nga mamugna.

Apan diay usa ka report nga naglambigit og sakyanan sa Kapitolyo. Usa ka Kia Carens color gray nga ang plate numbers SJC-305 nakit-an sa atong tigpaniid nga gisakyan og tawo nga nag-shopping didto sa Super Metro kaniadtong hapon sa Agosto 6.

Ang mireport nako nagkanayon nga nahibulong siya nganong gigamit man sa maong tawo ang sakyanan sa Kapitolyo nga holiday man ang maong adlaw?

* * *

May sakop kuno sa Barangay Intelligence Network (BIN) nga gidistino diha sa South Road Properties nga nakapusil g’yod og tawo, patay ra ba. 

Aw unsaon, nga ang kadagkoan nato sa kapolisan mitugot man nga makadala-dala og armas kining maong mga BIN. Maayo unta kadto og lisensyado ang ilang armas, dili ra ba g’yod.

May mga higala ko nga BIN nga ang armas lisensyado, apan ang uban usab, walay lisensya.

Kaniadtong Domingo, dihang mi-park ko sa akong sakyanan diha sa Plaza Sugbu atubangan sa City Hall, usa ka tawo maoy nagbantay sa parking area, may giluklok nga armas sa hawak.

Wala pa ra ba g’yod mag-uniporme ang maong tawo, kadudahan nga usa kini ka kriminal. Mahimong usa ka “watch your car boy” nga nagdala lang og armas.

Kinsa bay gitugyanan pagbantay sa Plaza Sugbo. Nganong duna may mga “watch your car” diha nga nag-operate nga unta ang atong dakbayan duna may balaud nga nagdili niini?

Kamong mga “police assets” sama sa BIN, kay gusto man g’yod mo nga magdala-dala og armas, palisensya mo og armas aron mahimong legal ang inyong pagabuhaton.

Tan-awa kadtong nakapusil didto sa SRP, sigun sa report midagan human kini makapusil. Unsaon nga ang armas wala tingali’y lisensya.

* * *

Ang pagkalit og pagkadatu ni Presidente Arroyo angay g’yod nga ipasabot niya sa katawhan kun diin kini gikan.

Sayonan ka nga dihang senador pa si GMA kaniadtong 1992, ang iyang katigayonan gikataho nga miabot lang og P6 milyones kapin. Apan karon, miabot na og P134 milyones.

Ang sweldo sa usa ka presidente P60,000 ra ang buwan. Kun unsa’y ubang gikuhaan og income ni GMA, angay niya kini nga ipasabot sa katawhan.