Ako ug ang FREEMAN

Kagahapon mao ang ika-90 nga anibersayo sa The FREEMAN, diin ako nagtrabaho isip maoy news editor. Ang maong selebrasyon maoy usa sa labing dako sa kasaysayan sa maong pamantalaan Ang akong pagsulod sa The FREEMAN matawag lamang nga incidental. Kini tungod kay wala g’yud ko magdahom nga anhi dinhi sa Sugbo mapadpad sa pagpangita’g panginabuhian.

Hinuon, ang pagsulod sa kalibotan sa diyornalismo dili maoy akong ambisyon sa akong pagkabata. Akong ambisyon sa dihang nagtungha pa ako sa elementarya mao ang mag-pastor sa among relihiyon, ang Seventh-Day Adventist.

Siguro tungod sa akong pagtungha sa SDA school maoy akong naumol ang ambisyon nga mamahimong magwawali sa among relihiyon. Apan adunay dakong problema nga maoy nagpaliko sa akong ambisyon ug magmugna og bag-ong direksiyon sa akong kinabuhi.

Kining maong problema mao ang akong pagkadili kamao mosulti atubangan sa publiko. Sa laktod nga pagkasulti, usa akong manggiulawon nga tawo.

Gani, sa dihang nagtungha pa ako, nagpangurog g’yud ko basta pa-diskursohon sulod sa campus. Mao gani kun mapugos ko pagdiskurso, ang akong kakulba moresulta sa akong pagkayungit hangtod nga dili na ako kahibalo nga mo-pronounce sa mga pulong nga akong isulti.

Hangtud nga ako na gayung gisalikway ang akong ambisyong mag-pastor sa Seventh-Day Adventist. Akong nadawat ang kamatuoran nga wala gayud ako’y art of speaking sama sa mga banggiitang evangelists o magwawali.  

Hinuon, usa usab sa rason nga wala nako tumana akong ambisyong mag-pastor mao ang akong pagka-barkadista. Tungod lagi sa mga barkada, dili gayud malikayan nga adunay daghang tentasyon nga makapahilayo kanimo ug sa simbahan nga imong gialagaran.

Ug sa katapusan, ako gayud nga giputol ang akong ambisyong mag-pastor. Ug panahon na nga mosubay og laing dalan paingon sa usa ka propesyon alang sa maayong kaugmaon.

Dinhi akong nadesisyonan ang pagsulod sa kalibotan sa diyornalismo. Akong nahunahunaan nga basta maningkamot lang, makat-onan ra gayud ang pagsulat ug sayon ra ang pagpanarbaho sa usa ka pamantalaan.

Una akong nahimong reporter sa mga pamantalaan sa Zamboanga del Sur, diin ako natawo ug nagdako. Hangtod nga misulod ko sa The FREEMAN Mindanao kaniadtong 1995.

Bag-o pa lamang nahimugso ang The FREEMAN Mindanao kaniadto ug sa akong pag-apply sa opisina niini sa Ozamiz City, walay kuti-kuting gidawat dayon ko ni Sir Merpu Roa, ang managing editor kaniadto kinsa tua na karon sa Estados Unidos, bisan pa man kun mao pa kadto among panagkita.

Sulod sa pipila ka tuig nako uban sa TF Mindanao na-improve gayud ang akong craft isip reporter. Bilib kaayo ko sa kapabilidad ni Sir Merpu pagdala og mga tawo. Beterano na siya sa propesyon ug dili siya tihik motudlo sa iyang nakat-onan ngadto sa mga batan-ong journalists sama nako.   

Ug sa nagsingabot ang 1998 presidential elections sa dihang nangita og deskman ang Cebu central office sa TF Mindanao tungod sa pag-leave ni Sir Abby Canturias, ang among chief editor, ako ang napilian ni Sir Merpu isip assistant ni Bong Fabe, ang news editor. 

Sa central desk sa TF Mindanao dinhi sa Sugbo nagsugod akong editing career. Dako usab ang pagsalig ni Sir Abby ug Bong Fabe kanako nga wala ko nila papaulia sa Mindanao pagbalik ni Sir Abby sa trabaho.

Sa dihang me-resign si Bong, kami na lamang duha ni Sir Abby ang nahibilin sa central desk. Milabay ang duha ka tuig ug mi-resign usab si Sir Abby, ug usa na lamang ang nahibilin sa desk.

Sulod sa upat ka tuig, ako lamang usa ang nagtikaw-tikaw sa central desk sa TF Mindanao. Hinuon wala ko mireklamo tungod kay dako man usab ang akong nakat-onan sa pagpadagan sa desk ug pag-edit sa mga estorya sa akong mga reporter gikan sa nagkalainlaing lugar sa Mindanao.

Kaniadtong 2004, nadesisyonan sa management nga i-close na ang TF Mindanao. Nunot niini, gi-transfer ko sa The FREEMAN Cebu ug dali ra akong naka-adjust sa sistema sa mas dakong pamantalaan tungod sa akong nakat-unan ug eksperinsiya sa TF Mindanao.

Dinhi sa The FREEMAN, daghan pang challenges ang among sagubangon aron matuman ang among misyon pagserbisyo sa mga Sugbuanon. Ug nagpasalamat usab kami sa dakong pagsalig nga gihatag sa mga Sugbuanon kanamo.     

Kay kun dili pa tungod sa dakong pagsalig sa mga Sugbuanon kanamo gikan pa sa nanglabay’ng katuigan, dili unta muabot ang The FREEMAN og 90 ka tuig pagserbisyo sa katawhan.

* * *

Email: [email protected]