EDITORYAL - Ang mandato sa ospital

Kanang desisyon sa City Hall nga dili na dawaton diha sa Cebu City Medical Center (CCMC) ang mga masakiton nga dili residente ning dakbayan sa Sugbu nakahatag og mangil-ad nga imahe sa siyudad.

Gani giyagayagaan kini sa pipila ka mga lumolupyo gawas sa siyudad kinsa nasagmuyo ngadto sa kagamhanan ning dakbayan.

Matud pa sa usa: “OK, sige na lang. Ang taga siyudad ray dunay katungod moantos diha anang ospitala.”

Pero bisan pa sa kamandoan sa City Hall, daghan gihapong taga lungsod ang moanha sa CCMC.

Gitagad gihapon kay matud pa sa usa ka nurse ang ospital adunay mandato nga dili mosalikway niadtong moanha diha aron magpatambal.

Matud pa sa usa ka pribadong doktor: “Ang order sa City Hall nagkinahanglan og review kun balikan sa pagtan-aw.”