Likay g'yod sa mga sakit

Dili na g’yod sayon karong panahona kun masakit ka kay pwerte na g’yong mahala sa bayranan sa ospital.

Duna ko’y napangutana nga pasyente nga ang sakit “high blood” sa tulo ka adlaw niya nga pag-estar sa tambalanan, miabot na kuno’g P18,000 ang iyang bayranan.

Ambot kining akong pasyente kay upat na man ka adlaw, wala pa ko masayod kun pila ang bayranan. Mao nga angay g’yod unta nga magmatngon kita sa atong panglawas.

Apan unsaon, kining ubang sakit gikan man sa mga lami kaayong pagkaon, sama sa litson-baboy, mga sinugba nga karne, mga kinilaw nga halang kaayo ang suka.

Kun molikay ta, usahay gukdon g’yod ta sa sakit. Bitaw ampo ra g’yod ta sa Ginoo.

Daghan usab ang wala pa g’yod masayod nga ang subra nga pag-inom og softdrinks ingon man pagkaon og mga aslom sama sa mangga nga pakapinan og hipon, makadaut usab sa panglawas.

Kini maoy gireklamo sa akong pasyente. Na-admit kini gikan pa kaniadtong Miyerkules. Magpasalamat ko sa kadagkoan sa DYLA ug sa The Freeman nga misabot ra tawon sila nako.

Walay kaso sa lindog kay tungod sa moderno nga kahimanan karon, bisan diri sa ospital makahimo man ko sa pagsuwat sa akong mga lindog og ipadala sa Banat News nga dili na moadto pa.

* * *

Nakahigayon ko sa pag-exercise pinaagi sa paglakaw-lakaw sa Osmeña Boulevard ug ubang duol nga karsada dapit sa Fuente Osmeña niadtong Biyernes sa gabii.

Wala pa g’yod diay hingpit nga natudloan og leksyon ang mga drayber.

Mora’g dili g’yod tingali sila angay nga kaloy-on kun masakpan nga dili pagpasiga sa suga o mag-drive og sakyanan nga depektoso ang suga.

Kapila na ako magbalik-balik dinhi sa atong lindog nga dagko na kaayo ang multa kun sila masakpan nga mag-drive nga dili magpasiga og suga, apan sigi man lang gihapon.

Akong awhagon ang mga LTO agents, mga sakop sa Task Force Alpha, mga traffic police ug CITOM enforcers, nga dakpon kining maong mga drayber.

Si Aden Belza, ang operations chief sa LTO-7 dinhi sa Central Visayas, miingon nga kadtong mga drayber nga dili magpasiga og suga mahimo nato nga dakpon ug i-charge og “reckless driving for failure to switch on” sa ilang headlights.

Kanus-a pa man kita mohingusog pagpanakop, unya na ba kun dunay aksidente nga daghan ang mangamatay?

* * *

Dunay usa ka “brand” sa motor nga gipanid-an karon sa mga LTO agents kay ang dealer lahi nga ngalan sa gibutang diha sa Certificate of Registration.

Mga 200 na kuno ka motor sa maong brand ang dia na-distribute dinhi sa Sugbo.

Maayo tingali nga kamong mga nakapalit niining maong matang sa motor nga ang brand nagsugod og “L” susihon daan ninyo sa LTO kining maong isyu aron mentras sayo pa, makorehean na.

Tingali og mapareho unya sa usa nako ka higala nga nakapalit og motor sa usa ka dealer sa Bogo pinaagi sa installment, apan pagka impas wala g’yoy rehistro nga nahatag kaniya.

* * *

Duha na diay ka operation sa mga sakop sa LTO nga wala ko makauban. Sa miaging operation nila sa Talisay naatul nga didto kami sa Ilocos Norte, dayon sa miaging Biyernes may pasyente ko nga na-admit.