Asphalt storm ug road user's tax

Ting-ulan na pud. Basta ting-ulan na gani, mosamot kadagko ang mga dagko na daang lungag sa karsada. Dili nato mamatikdan nga ang ato diay’ng gipadulngan pwerte diay’ng lawoma  nga libaong, kay matabunan man kini sa tubig. Sakit sakit gyud paminawon kun ma-shoot ang atong sakyanan sa maong mga libaong.

Nagsige man kitag kabasa mahitungod sa gipasibantog nga Asphalt Storm, apan ang mga libaong sa karsadang akong giagian kada adlaw anaa pa man gihapon. Giabtan nalang ta sa ting-ulan.   Ambot kun maayo ba kaha nga tayming ang mag-aspalto sa ting-ulan, kana kun karong mga buwana naba gyud sad kaha ipatuman   ang Asphalt Storm.

Kaysa pagka-karon, wala pa man goy asphalt nga atong natagamtaman. Hinuon, ang “storm” wa sad gyud papiri, ug mao man gani nga nasinati nato kining pag-ulan ug kusog nga hangin.

Naunsa mang pagka-unsaa nga ang atong pinalangga nga dakbayan, usa sa nag-unang mga dakbayan sa nasud, diin ang mga dagko nga negosyo nahimutang, dili man makamintinar sa kadalanan, usa sa labing basic nga panginahanglan sa usa ka dakbayan? Kini sab nga mga ahensya sa goberno nga maoy tigmentinar sa kadalanan,   usa man unta sila sa kinadak-an og gahin sa atong national budget, bisan pa sa ato na kunohay nga pag-asenso ug luyo sa moderno na natong panahon, apan wala man gihapon nila matarong ang atong kadalanan. Hagip-ot, walay klarong marka, gubot nga sidewalk,   mga direksyon sa trapiko sama sa No Entry, No Left Turn ug No U-Turn nga usahay mas makadugang sa trapiko kaysa mosulbad niini, ug   labaw sa tanan,   mga libaong nga morag Taal Lake kadagko.

Niadtong miaging mga bulan, diha kadtoy huhungihong nga ang mikabat sa P50 bilyones nga abot sa Road User’s Tax nga gibayad sa mga adunay sakyanan sa LTO wala maklaro kun hain paingon. Bisan na lang unta gibahinan ang Sugbo og P3 bilyones, tingali pwerte nang nindota ang atong mga kadalanan karon. Adunay lakang aron pag-imbestigar niini, apan karon pa lang gani, dautan na ang pagduda sa mga magbubuhis. Mao lagi bitaw kini nga mahimangud gyud kita kun aduna na gani bag-ong buhis nga imbentohon sa atong mga kadagkoan. Sakit kaayo sa atong bulsa nga maibanan ang atong daang gamay na nga sweldo aron iamot sa gobiyerno isip buhis,   pero ato lang mahibaw-an nga wala diay mapunta ang atong  hinaguan alang sa kaayohan sa nasud, kondili tua lamang sa pipila ka mga     tawo.

Kun tinuod nga adunay ikagahin kining atong nagbaguod nga pinalanggang dakbayan,   dan atong awhagon ang atong mga higala nga talahorong opisyales sa Dakbayan sa Sugbo, ayaw na intawon paabota nga adunay eleksyon ayha pa kita makahimo sa hilimuon nga angayan untang matagamtaman sa mga Sugboanon sa primero palang adlaw sa inyong paglingkod sa posisyon.

Alang sa inyong mga panahom, palihug email sa [email protected].  Daghang salamat.