EDITORYAL - Nabanhaw ang Ginoo

Christ is risen! Si Kristo nabanhaw!

Karong adlawa atong gisaulog ang pagkabanhaw sa atong Ginoo human sa tulo ka adlaw nga kamatayon didto sa bukid sa Kalbaryo mga 2,000 ka tuig na nga minglabay.

Ang pagkabanhaw sa atong Ginoo mipakita sa iyang kadaugan batok sa kamatayon. Ug sa tiunay niyang pagka-makagagahom.

Sa maong kadaugan ni Kristo mitumaw ang paglaum diha sa dughan ug kasingkasing sa matag usa ka Kristohanon...paglaum diin dunay makab-ot nga kahimayaan kun hugot ug hingpit ang pagtuo ngadto Kaniya.

Gitawag kining adlawa nga Pasko sa Pagkabanhaw. Dayag na lang nga kining adlawa angay’ng ikalipay ug ihudyaka kanatong mga binuhat nga nahigugma sa atong Magbubuhat kinsa nagmadaugon batok sa kamatayon.