Mabungang halaman

Sa mga kasama ako’y nagtataka

sa aking pagtula ay naiirita;

Dapat na tantuing sapul pagkabata

nasanay na ako sa pagtula-tula!

Grade 4 pa lang noon ay napili ako

sa mga unit meet sa tula’y pambato;

At sa mga kubol kung buwan ng Mayo

pinatutula ng hermana’t hermano!

Sa high school sa tuwing mayr’ong comvocation

kasama sa program pagtula ko roon;

Kapagka may reyna saka koronasyon

itong inyong lingkod makatang marunong!

Saka nang mag-college sa mga timpalak

ay walang tumalo sa gawang pagbigkas;

Labanang pambansa at pang-unibersidad

sa pagsasalita sila’y tumbang lahat!

Katulad ko noon ay si Manny Pacquiao

sa bawa’t paglaban ay nagtatagumpay;

Pero bakit ngayong lumawig ang buhay

sa aking pagtula ay may umaangal!

Sa senior citizens ako ay opisyal – -

laging tumatayo na MC ng program;

Sila ay tutol ding yaong ay gampanan

wala namang ibang makuhang mahusay!

Palibhasa ako’y mahusay tumula

sa mga fund raising daming napapala!

Pulitiko’t hindi kapag nagsalita

ay nagdadatingan ang mga biyaya!

Ang mga kritiko ay bakit ba ganyan

ang nakatutulong ay gustong busalan?

Totoo sigurong “mabungang halaman”

laging binabato saanma’t kailanman!

Parang gusto nilang sila ang bayani

wala namang dunong silang masasabi;

Itong aking “talent” ay lubhang mabuti

at nagpapayaman sa Wikang Sarili!