Tikdol Sa Pordoy

Kun adunay lugar nga kahadlokan diha sa dakbayan sa Mandaue, walay lain kun dili kanang North Reclamation Area (NRA).

Kaniadto na nato nadunggan ang mga kasong pagpanulis ug pagpamatay nga manghitabo nianang hawan nga luna sa NRA.

Karong bag-o, usa ka empleyada sa MEPZA ang gitabonan og mga sagbot sa NRA sa barangay Subangdaku human kini gipanamastamasan ug gipatay sa iyang textmate.

Nahinumdom usab ko sa nahitabo niadtong manager sa bangko nga gitulis ug gipatay samtang nag-atiman sa iyang sakyanan nga mitirik sa NRA. Gawas sa maong mga krimen, daghan pang mga panghitabo sa lugar.

Sa laktod, problemado sa seguridad ang NRA.

Sa panahon ni Mayor Thadeo Ouano, kanunay makit-an sa NRA ang mga patrol car sa kapolisan. Bisan sa kagabhion, adunay mga patrol car nga magtuyoktuyok sa lugar aron sa pagseguro sa kalinaw sa bisan asang suok sa reklamasyon.

Sa panahon karon ni Mayor Jonas Cortes kanus-a nanguhong ang dagkong mga establisamento, wala na hinuon ko makakita og patrol car sa NRA. Apan kun adunay mga tapok-tapok sa mga baryo sa Mandaue uban ni Jonas, atua ang mga patrol car.

Dili ko motuo nga wala masayod si Jonas nga mas importante ang patrol car diha sa NRA kay sa pagsunodsunod niya. Trabaho niya ang pagpakisayod unsa nga lugar sa iyang siyudad gikinahanglan ang presensiya sa kapolisan.

Ang barangay Subangdaku ubos sa hurisdiksiyon sa Mandaue City Police Office Police Station 1 nga ubos sa pagdumala sa buotan nga hepe nga si Sr. Insp. Edilberto Castañeda.

Nasayod ko sa paninguha ni Castañeda aron matuman niya ang iyang katungdanan isip hepe sa kapolisan sa Subangdaku. Mangunay kini sa mga operasyon, dili sama sa ubang hepe nga magpadako lang sa tiyan diha sa presinto magpunay og katulog. Usa ka gabii niana, gipahunong ang gimaneho nakong motorsiklo sa nag-checkpoint nga kapolisan atubangan sa La Tondeña. Nailhan dayon nako ang mapa-ubsanon apan abtik nga kanhi sakop sa Homicide Section sa Cebu City Police Office nga si “Sir Eddie” nga didto nangunay og pang-inspeksiyon sa mga lisensiya ug rehistro sa mga motorsiklo nga ilang mapahunong.

Apan maayong masayod kita nga ang programa alang sa kahusay ug kalinaw naggikan sa mga opisyal sa usa ka dakbayan o munisipalidad, samtang ang mga opisyal sa kapolisan maoy mopaigo sa pagpatuman niini sa tagsatagsa nila ka area of jurisdiction.

Ingon unta niini ang angay mahitabo sa Mandaue. Si Jonas ang mopanday og mga programa alang sa kahusay ug kalinaw, pinaagi sa abag sa mga sakop sa konseho. Ang kapolisan na ang mopatuman niini diha sa ilang mga hurisdiksiyon.

Naka-apan lang kay bise na kaayo si Jonas sa politika sa tuyo nga makagunit og balik sa renda sa pangagamhanan diha sa Mandaue karon nga sibaw na ang tabi-tabi nga hagiton ni Kongresista Nerisa Soon-Ruiz ang iyang liderato karong 2010.

* * *

TEXT TIKDOL

“Sir muzta naa unta ko isumbong nmo kini amu silingan nga nagnegosyo ug septic dri sa tupas st brgy pasil, ang ila hinabwa nga tai dha ra sa manhole ila bodega ipagawas ad2 lapos sa sapa sa forbes bridge pwerting bahoa evry 12 jud na n every evening cla maghabwa wala jud na sipyat. Confirm naman namo ky nisuka naman iya tawo sa una nga iya nanggtaktak. Ang nem sa JCM septic.”

“Amu naman gpaabot sa concern sa cty hall ila giinspection pro ghatagan rman ug sobre la ghapon kaposlanan ang nakapait pa jud gitug an pa jud ako identity mao nana me threat gilabayan amu balay dako nga pabuto ambot mura dnamita. Paita btaw sir john ang amu lng unta ipasiminto lng unta na ila manhole sa ila bodega para d na cla makahabwa dha. Salamat daan, we hop imu me tabang kaw nalang amu pag asa tawon para amu mga bata dre d tawon mangasakt, makta nmo na sir ky makaagi ka dha sa tupas st”

- 0918*****65

“Gudpm, morklamo q b ang mayor sa San Fernando dli k gusto ang ptkarn nya. Kay ngano knang tubig ng tubod lng dli  p gyod limpyo gbutngan p jud ug kwentador. Dpat dli n btangan kay tubod r bya n. Maayo p kad2ng unang mayor c mayor Abe Canoy mahusay p.pero kron nhimo ciang mayor daghn kuskus blungos. Gbut p.”

              - 0910****684.

“Gd pm sir pwedy mokomen ko anang gepanday nga balaod nga ang nursing 5 ka tuig na palhug ko padangat sa ako komen ana kaming mga genikanan naglisud man gani sa 4 ka tuig pon-an pa jud ug usa maayo lang na iya balaod kn naa daghan kwarta k.

        - marilo quijano, talamban, cebu

“Budy naa ngtel nku dd2 sa argao, naa daw dealer ug soya nga fake, dghan na clan a victim, mga skul ila na victim casay elem school ug mga sibonga tchr. For info.”

- 0905****874