Overnight parking

Ang tag-iya sa cell no.  0920-6928572 mi-text nako niadtong Oktobre 20, 2008 aron pagpadangat sa kasayoran nga naa (kuno) mga sakyanan nga mag-overnight parking diha sa atubangan sa New Ramos building.

“Maayo unta’g masusi ni sa Citom, nagkanayon ang atong texter.

Hinaot unta nga masusi sa Citom ang dapit nga gitumbok sa atong texter. Kini ra bang overnight parking usa sa hinungdan nga maglisod pagsulod ang truck sa bombero sa usa ka dapit sa higayon nga may mahitabo (simbako) nga sunog.

Usa sa rekisitos kun naa kay sakyanan mao nga naa ka say garahean niini. Dili maayong sa karsada i-parking ang sakyanan kay makasagabal kini sa moaging mga sakyanan, labi na kun dili sab lapad ang dalan.

* * *

“Good Am, Sir. Diri sa Labogon, atbang gyud mismo sa brgy. hall naay sugal kada adlaw. Ang mga brgy. opisyal igo lang nagsud-ong. Wa gyu’y gihimong aksiyon.” -- 0922-9978880 (Sent: 05:52:08pm-- October 21, 2008)

Kun maoy atong tuohan ang atong texter, makaingon tang untouchable kanang nanggisugal diha atbang sa brgy. hall sa Labogon kay dili man kaha makabadlong ang mga brgy. opisyal nianang mga tawhana. Tiaw bay maghinan-aw lang sila! Tinuod ba kini, Kap?

In fairness ngadto sa mga opisyal sa brgy. Labogon, dili lang una nato sila kondenahon. Bukas kining lindog alang sa ilang pagpasabot sa ilang habig. Ipatik sab nato ang ilang reaksiyon.

Ug hinaot unta nga ila nang maaksiyonan ang giingon sa atong texter nga sugal “atbang mismo sa brgy. hall.” Aksiyoni!

* * *

“Sir, puwerting samoka diri sa C. Padilla tungod ining daghang mga taxi sa Cor. (clue lang kini) nga anaa mag mag-parking both sides sa karsada. Dugay na kaayo ni. Wa gyud magpakabana ang Citom.” -- 0906-2544848 (Sent: 06:31:21pm-- October 21, 2008)

Aksiyon, Citom. Susiha kining gireklamo sa atong texter. Ako mismo makamatuod niini kay pirme sab kong makakita sa kadaghan sa mga taxi nga mag-parking both sides sa higayon nga mahiagi ako diha sa C. Padilla. Mao pay apiki kanang karsadaha, parkingan pa both sides, samot og kapiot!

* * *

 (Sumbong ug reklamo? Text sa 0910-8105522).