Walay bayad ang overtime

Daghang mga employer, kompaniya ug mga pabrika nga mi-violate sa lagda mahitungod sa regular working hours. Ang balaod nagtakda nga walo ka oras lang ang regular nga working hours. Kun molapas niini, maisip na kana nga overtime ug angay nga aduna kini overtime pay.

Pero daghang mga trabahante ang nahikawan sa overtime pay. Gipahimuslan sa ilang employer ang ilang kusog pinaagi sa pagpatrabaho kanila sulod sa napulo ngadto sa dose ka oras (o labaw pa niini) pero wala bayri ang ilang pagtrabaho sa overtime.

Mao kini ang unod sa text reklamo sa usa ka magbabasa nga nagkanayon: "Good day. Naay kompaniya diri sa Lapulapu City dapit sa Maribago nga ang ilang trabahante kun ma-late naay deduction ang suweldo pero kun mag-overtime ang ilang trabahante walay bayad. Asa man moduol ang mga trabahante aron matabangan sila sa ilang problema?" -- 0909-9470091

Adto sila modangop sa DOLE. Magsang-at sila’g reklamo nga non-payment of overtime.

* * *

"Good day, Sir. Diri sa may karaan nga office sa NSO dapit sa M.J. Cuenco adunay mga tawo nga mangawat sa tubig sa MCWD. Moabli sila panahon sa kagabhion sa mga tubo diri." -- 0907-2462778

Kamo man gyod ang nasuheto sa maong dapit ug nakasaksi sa nahitabong pagpangawat, labing maayo nga magpadangat kamog kasayoran ngadto sa buhatan sa MCWD kalabot nianang mga kawatan og tubig.

Mas maayong makapadangat sab mog kasayoran ngadto sa barangay aron ilang kaaksiyonan ang maong problema.

Sa samang higayon, kun adunay opisyal sa barangay diin nahisakop ang dapit nga gihisgotan sa atong texter nga nakabasa niining sinulat, hinaot nga inyo kining masubay ug maaksiyonan. Ug salamat daan.

* * *

Kadtong mga texter nga, imbes modetalye sa mga panghitabo nga ilang nasinati, mopasulabi hinuon sa ilang emosyon, dili gyod nato mahatagan og pagtagad ang ilang text.

* * *

 (Sumbong ug reklamo? Text sa 0910-8105522).