Sa sityo Cactos

“Good AM, Sir. Dugay na kaayo ning video karera diri sa sitio Cactos, White Road, Inayawan, wala gyud dakpa. Kun dakpon man, iuli ra man sad dayon sa polis.” -- 0909-7727193 (Sent: 09:41:32am-- July 19, 2008)

Kun tinuod nga ingon niini ang estilo sa kapolisan sa panggukod sa mga operator ug caretaker sa video karera, makaingon kita nga dili sila seryoso sa ilang kampanya batok sa illegal nga kalihokan.

Kun manakop sila’g video karera pero iuli ra sab dayon ang maong mga makina, makaingon kitang “papogi” lang ang ilang gibuhat. Aron ingnon nga nagtrabaho sila ug wala magpasinaw lang sa lingkoranan.

Seryosoha ninyo pagtuman ang inyong katungdanan, Sir, uy!

* * *

“Sir, naay video karera diri sa among silingan. Panyang ang ngalan sa caretaker diri sa crossing Tabunok. Gikuha na ni sa una pero nabalik kay naay polis nga nag-backer nila. Maayo unta maaksiyonan ni sa kapitan.” -- 0915-3818505 (Sent: 05:57:25pm -- July 19, 2008)

Angay aksiyonan ang video karera nga ang caretaker giila lang sa ngalan nga Panyang. Labing maayo sab nga ma-counter check sa opisyal sa PNP kun kinsa sa ilang mga sakop ang nagpaluyo sa video karera operations sa Tabunok. Angayan ilhon ug nganlan ang maong polis! Aksiyoni kini!

* * *

Bahin sa rugby: “Sir, diri sa merkado sa Carbon daghan na kaayong rugby boys. Duol man unta ni sa police station. Mga alas 4 sa hapon magpundok ang maghingos og rugby.” -- 0928-4325029 (Sent: 10:55:36pm-- July 19, 2008)

Bahin gihapon sa rugby: “Good day. Diri sa Tres de Abril dapit sa may sapa naay menor de edad nga mga lalaki nga magsuyop og rugby. Makuyawan gyud mi ini.” -- 0928-6999713 (Sent: 11:15:24pm -- July 19, 2008)

Kining maong suliran nagkinahanglan sa dinaliang pagtagad sa proper authorities. Una, ang barangay. Angay silang manginlabot niini. Ikaduha, ang kapolisan, mas maayong ila kining maaksiyonan. Ikatulo, ang social welfare. Sa akong tan-aw, angay sab silang manginlabot niini.

Aksiyon!

* * *

(Sumbong ug reklamo? Text sa 0910-8105522).