Viva Pit Senyor

Ning semanaha atong gisaulog ang ika 443 ka tuig nga kapistahan ni Senyor Santo Niño. Nunot sa iyang kapistahan ang mga dumoduong naghinamhinam na sa labing dakong kalihokan nga gipasiugdahan sa kagamhanan, ang Sinulog.

Ang Sinulog gituyo alang sa pagyukbo, pagpamarayeg ug pagpasalamat ngadto sa batang Jesus apan morag natabunan na ang maong katuyoan sa interest sa mga negosyante ug turismo. Ang Sinulog dili na lamang usa ka relihiyosong kalihokan tungod kay misiping naman niini ang interest sa turismo nga maoy hinungdan kun nganong nakuhaan kon wa man gani mawagtang ang esensiya niini. VIVA PIT SENYOR na lang kaninyong tanan. Welcome to Cebu.

* * *

Maayo nga nabulgar ang pagkasignit sa giingong suspect sa pagpatay ni Piskal Osorio. Maayo upod nga mireklamo ang saksi sa pagpatay ni Piskal Osorio nga gipugos siya sa pagpapirma sa mga police sa affidavit nga nagtumbok sa maong suspect nga maoy mipatay ni Osorio. Kun nagpadala pa ang saksi sa pagpugos sa mga police labing seguro nagmalampuson na ang mga police sa pagpasaka og kaso sa tawo nga way kalambigitan sa pagpatay ni Piskal Osorio.

* * *

Aron masulbad ang suliran sa druga maoy gisugyot sa Chairman sa Dangerous Drugs Board Vicente Sotto III ang pagpaubos sa random drug test sa mga tinun-an sa high school ug kolehiyo. Porbida ning sugyot nimo Mr. Chairman pagka wa gyoy ayo. Ibutang ta nga positibo sa ginadiling drugas ang tinun-an nga gipaubos sa random drug test masumpo ang problema sa drugas? Pagka toytoy! Mas maayo pa seguro nga Mr. Sotto nga diha ka na lang sa Eat Bulaga!