Ang corruption ug drugas

Gimando sa presidente ngadto kang Department of Justice Secretary Raul Gonzales ang pagpabiya lang una sa ilang katungdanan niadtong mga State Prosecutors nga nalambigit sa kontrobersiyal nga Alabang boys.

Matod pa sa mga alepores sa Presidente nga kining maong kamandoan nagpakita lamang sa sensirong tumong sa gobyerno paggukod ug pagpuhag sa suliran sa ginadiling drugas.

Ang pagsumpo sa suliran sa drugas dugay na gani, gipadak-an sa balaod ang silot nga ipahamtang niadtong mga tawo o grupo nga nalambigit sa nahisgutang suliran apan ina kay maibanan, nilipang tungod sa corruption.

Tungod sa corruption nga nakasulod na sa bantayog sa sistema sa atong hustisya napakyas ang gobyerno pagsulbad sa suliran sa drugas. Tungod sa corruption nainganyo ang mga sindikato sa pagpayuhot sa ginadiling drugas gumikan kay sayon raman kaayo nila ang paglingkawas niini gamit ang kuwarta.

Tungod sa corruption dismayado ang katawhan ug naibanan ang pagsalig niini sa kampanya sa gobyerno sa suliran sa drugas gumikan kay ang mga gagmay lamang ug way ikabayad sa kaso ang natanggong sa prisohan samtang ang may ikabayad ug influensiyado gawasnon nga naglaroy-laroy ug nagpadayon sa ilang illegal nga negosyo.

* * *

Giduso ni Senador Zubiri ang pagpabalik sa silot sa kamatayon alang sa mga piniling kaso sama sa illegal nga drugas. Apan ang kining balaudnon makalabang kaha sa Senado ug Ubos bay balauranan nga giharian sa mga magbabalaud nga maki-Arroyo? Basin nalimot ka Migz nga si presidente Arroyo ang nagpawagtang sa silot sa kamatayon. Ibutang ta nga makalabang sa kongreso ang pagpabalik sa silot kamatayon dili kaha kini pikatan lang ni Presidente Arroyo? Nag-usik-usik ka lang sa panahon Migz.