Nagtong-its

"Good day, Sir. Diri sa lungsod sa Tabuelan nagkuha ko og police clearance. Dugay kaayo ko giisyuhan. Upat ming nagpaabot nga isyohan og police clearance. Kay gaduwa pa man og tong-its ang mga polis. Wa gyo’y nakabadlong nila. Inigkapalis adto sila sa Tabunok kay magtigbakay. Suod nila ang tag-iya sa tigbakayan." --0929-2777859 (Sent: 10:20:01 am--October 22, 2008).

Sumala sa atong texter, polis sab ang "tag-iya" sa tigbakayan sa Brgy. Tabunok.

Kun tinuod man ugaling kini, pastilan pagkatulibagbag paminawon. Dili gyud masulbad ang illegal nga sugal kun lakip ang mga polis maoy magpasiugda sa paghimo niini.

Base sa Presidential Decree No. 449, ang tigbakay giila nga usa ka illegal nga sugal. Angay ning dakpon, santaon ug sumpoon sa polis. Dili kay polis na hinuon ang magpasiugda niini.

Maayo tingaling subayon sa hepe sa Tabuelan PNP ang binuhatan sa pipila niya ka polis nga gipasanginlan sa atong texter nga nalambigit sa illegal nga sugal.

Aksiyon, Tsip!

* * *

Ang naggamit sa cell. no. 0919-2887330 mi-text nako aron pagpadangat sa iyang alegasyon nga naa kunoy mga sakop sa Bantay Dagat nga corrupt. Imbes Bantay Dagat sila, nahimo na hinuon nga Bantay Dawat!

Sa iyang text nako niadtong Oktobre 22, 2008, ang atong tipster nag-ingon nga magbaguod (kuno) og alsa ang mga sakop sa Bantay Dagat sa tulo ka sako sa isda nga i-suborno kanila sa Purse S.

Sumala sa atong texter, nahitabo kini sa kadagatan nga nahisakop sa lungsod sa Cordova.

Angayan ning susihon sa kadagkoan sa Bantay Dagat aron masuta kun tinuod ba o dili nga adunay pipila nila ka sakop nga naghimog binuang sa ilang pagpatrolya sa kadagatan.

Dili masumpo ang illegal fishing kun ingon niini buhaton sa Bantay Dagat.

* * *

(Sumbong ug reklamo? Text sa 0910-8105522).