Sugal sa Tolotolo

Usa ka asawa nga nagpuyo sa Tolotolo, Consolacion, Cebu nga naggamit sa cell. no. 0920-3811740 mi-text nako niadtong Agosto 10, 2008 (Sent: 09:56:54 pm) aron pagpahibalo nga rampant kaayo ang sugal sa maong dapit.

Sumala sa atong texter, ang Tolotolo nahimong pugaran sa mga sugarol karon. Segon sa iyang text, rampant kaayo ang sugal nga mahjong, tong-its ug hantak sa Tolotolo, partikular na sa Purok Nangka.

Gibutyag sa atong texter nga kusog kaayo ang sugal sa Purok Nangka labina sa adlaw'ng Sabado ug Domingo. Gihulagway sa atong texter nga "gubot" kaayo ang sugalan sa Purok Nangka sa nahisgotang mga adlaw.

"Ako unta ning ipa-raid kay ang akong bana dili na mopauli sa balay tungod sa sugal," nagkanayon ang atong texter.

Angay ning aksiyonan, una sa tanan, sa mga brgy. opisyal. Ang nahisgotang mga sugal -- mahjong, tong-its ug hantak-kalapasan sa Presidential Decree No. 1602 busa angay gyod kining sumpoon.

Aksiyoni gilayon!

* * *

"Sir, naay grabe nga sugal nga tigbakay diri sa dapit sa Kalubihan, Talamban. Ang nagdumala ini mao kanang tag-iya og litsonan. Di ba diay ni masumpo?" -- 0919-7331059 (Sent: 04:35:37 pm--August 10, 2008)

Ang tigbakay klarong kalapasan sa Presidential Decree No. 449. Dili kini angay i-tolerate.

Ato gihapong sangpiton ang atensiyon sa mga opisyal sa brgy. Talamban. Kamo man gyod ang mas nasuheto sa inyong dapit, mas maayo nga inyong ma-counter check kining gisumbong sa usa nato ka texter.

Labing maayo nga palihokon ninyo ang inyong mga tanod. Kining tigbakay dili man unta lisod panid-an kay dili man kini ikatago. Dili man kini puydeng ipahigayon sulod sa usa ka kuwarto sa balay. Anha man gyod kini ipahigayon sa usa ka espisipikong luna busa kun molihok lang ang mga tigpatuman sa balaod, seguradong masakpan gyod kini.

Busa, aksiyoni!

* * *

(Sumbong ug reklamo? Text sa 0910-8105522).