Perlas ng silangan?

Sa bilog na mapa ng ating daigdig

Bansang Pilipinas kay ganda ng hugis;

Mga pulo itong matikas ang tindig

At asul na dagat ang nasa paligid!

Kung pagmamasdan mo’y pulong watak-watak

At waring hinati ng hanging habagat;

Ito’y mga islang umusbong sa dagat

Nililok ng Diyos kung kaya mapalad!

Mga tao rito’y iisa ang lipi

Mga mamamaya’y iisa ang lahi

Ang kalakhan nito ay may tatlong hati

Subali’t iisa ang layuni’t mithi!

Kinilalang Luzon, Visayas, Mindanao —

Mga tao rito’y iisa ang pakay;

Maraming dayuhang dito ay nangamkam

Pero lahat sila’y umuwing duguan!

May mga bayaning dito ay nagtanggol

Na pawang nabulid sa bundok at burol;

Sa mga dayuha’y di sila umurong —

Ipinakilalang matapang ang Pinoy!

Matatapang sila’t hindi natatakot

Sa mang-aaliping masama’t balakyot;

Kaya itong bansa sa mapang mabilog

Ay tinitingala sa buong sinukob!

Mga kabataang dito’y isinilang

Nagmana ng giting sa mga magulang;

Ang talim ng diwa’y mula kay Gat. Rizal

At kay Bonifacio nagmana ng tapang!

Subali’t sa ngayon ang iisang pulo

Pinaghaharian ng takot at gulo —–

May mga kalahing ang gusto’y mamuno

Hihiwalay silang bukas ay di tanto!

Kaya ang dalangin nitong ating pitak

Sana ay maghari ang damdaming tapat;

Itong mga pulo’y magkaisang ganap

Sa dulong silanga’y manatiling Perlas!