Gidalidali og dismiss

Sa Manila, naila ang Malate nga distrito sa kalingawan panahon sa gabii hinungdan nga ang mga karsada dinhi nanguhong ang mga night bar, diskohan videoke bar, massage parlors ug mga imnanan ug kan-anan daplin sa karsada.

Walay puas ang kaalegre sa Malate matag gabii. Mosamot kini og kaalegre sa mga adlaw nga Huwebes hangtod na sa Sabado tungod kay mao kini ang mga adlaw alang sa “gimik” sa mga Manileño.

Dinhi sa Sugbu, aduna kitay uptown area nga alegre usab panahon sa gabii. Sugod sa Fuente Osmeña rotunda hangtod sa Mango avenue, masaksihan ang mga imnanan nga dili usab kalupigan ang kadaghan sa mga parokyano nga manginom.

Gusto nato o dili, nahimong nang tipik sa sistema sa tawo ang paglingawlingaw. Ambot usab nganong ganahan man kaayo og inom-inom ang tawo kun gusto niining maglingaw.

Dili sama sa Malate sa Manila diin dug-ol ang mga entertainment houses, dinhi sa Sugbu nagpat-ak pat-ak ang mga balay kalingawan. Kun gusto kita og mga night bar, dunay sa dalan Ramos, sa Sanciangko usab ang mga hubo-hubo.

Bag-ong gipanghambog natong mga Sugboano ang Mango Square nga sukad sa milabay’ng mga tuig, alegre ug gihugpaan og mga batan-ong nangita og lingaw sa kagabhion.

Sa Mango Square nato makita ang mga videoke bars, imnanan ug mga diskohan.

Ang wala lang gyud mauyoni sa publiko, lakip na sa kagamhanan sa dakbayan ug ni Mayor Tomas Osmeña dinha sa Mango Square ang kaluag sa seguridad sa maong lugar.

Anha dinha sa Mango Square mag-abot-abot ang mga miyembro sa mga fraternity nga init sa usa’g-usa. Dayag usab kaayo ang mga miyembro sa mga gang nga kun manganha may magbabag gyud sa kilid nga kun dili man pistola, kutsilyo gyud nga igong makamatay kun gamiton sa pagpanunggab.Makausa na kining gipasirad-an ni Tomas ang Mango Square tungod lagi sa paglapas sa balaud tungod kay wala kini maghatag og saktong ka-parkingan sa mga sakyanan sa ilang mga suki kay ang hawanan gipanghikyaran og mga lamesa ug mga kiosk diin anha dayag nga magpunsisok ang mga batan-ong naglingawlingaw.

Makadaghan na nga gialarma ang lugar tungod lagi sa kagubot nga gimugna sa mga gang ug frat.

Apan sa akong obserbasyon, wala gihapoy kausaban ang seguridad sa maong lugar.

Niadtong miaging gabii, pito ka mga tawo ang nangatanggong sa Fuente Police Station tungod sa kagubot sulod sa Pump 2 Disco nga nahimutang sulod sa Mango Square.

Maayong masayod ang mga tagdumala og mga balay kalingawan dinhi sa siyudad nga samtang anaa sa ilang hunahuna ang negosyo, apan maayong dili nila isakripisyo ang seguridad sa ilang mga suki.

Ambot unsa ka tinuod ang gi-text sa usa nako ka higala nga editor nga pirme usab magduwaan og mga balay kalingawan sa Pump aron lingawon ang iyang hinigugma, nga mao diay dili makatarong og patunhay sa seguridad ug kahapsay sa Mango Square ang mga guwardiya tungod kay ang mga chicks ra usab diay ang ilang kanunay’ng tan-awon ug bantayan.

* * *

DALI-DALI. Mireklamo ang operator sa VIP Club nga nag-operate og mga slot machine sa casino diha sa Rajah Park Hotel sa Fuente Osmeña batok sa usa ka huwes tungod sa pagdalidali niini og dismiss sa kaso nga ilang gisang-at batok ni Mayor Tomas Osmeña ug sa kagamhanan sa dakbayan sa Sugbu.

Ang Waz Lian Management Philippines, Inc. ug My All Group Limited nakatuaw sa langit nganong gidalidali ni Judge Sylva Aguirre-Paderanga ang pag-dismiss sa kaso nga daghan pa man unta kini og mga mosyon nga angay resolbahon.

Si Paderanga maoy presiding judge sa Regional Trial Crourt Branch 16 diin gipaminaw ang kasong pagpadeklarar nga nulo sa closure order nga gimando ni Tomas batok sa VIP Club sa hotel.

Bisan ako nga gamay lang og nasayran kabahin sa balaud nahibulong usab nganong nagdalidali man si Paderanga og dismiss sa kaso nga wala man gani pangayoa ni Tomas pinaagi sa mga abogado niini ang pagpa-dismiss sa kaso.

Karon pa ko kasugat og kaso nga motu proprio nga gi-dismiss sa huwes nga wala gani paminawpaminaw sa habig sa reklamante (plaintiff) nga mao ang Waz Lian ug May All.

Walay nahimo ang mga reklamante batok ni Tomas gawas sa pagsang-at og urgent motion for reconsideration dungan ang pagpangayo sa pagpa-inhibit ni Judge Paderanga sa kaso tungod sa nakita nilang iregularidad sa ginunitan sa maong kaso.

Dili hinuon ko motuo nga hadlok ang presiding judge sa Branch 16 ni Tomas mao nga iyang gi-dismiss ang kaso bisan wala pangayoa sa respondent nga maoy gihatagan og remedyo ubos sa Rules of Court sa pag-file og motion to dismiss.

Ang habig sa Waz Lian ug My All aduna pay aplikasyon alang sa status quo ante aron makapadayon og operate ang VIP Club bisan nagpadayon ang kaso, aplikasyon alang sa preliminary mandatory injunction nga gi-schedule pa og hearing ug adunay motion for inhibition nga pulos wala maresolbar.

Bisan ako mahibulong nga adunay mga aplikasyon ug mosyon nga wala maresolbar sa korte unya i-dismiss na hinuon ang kaso.