Ang anak ni Brod Soc

Sa kadaghan na nga insidente nga gikalambigitan ni Joavan Fernandez, ang adopted nga anak ni Mayor Socrates Fernandez sa Talisay City, daghan ang nakapangutana unsa gyud kini ka gamhanan nga hangtod karon wala gihapon matandog.

Duha ko ka bulan nga mihunong sa pagsulat tungod sa personal nga kalihukan nga akong giatiman, ug sa pagbiya nako si Joavan ang unod sa headline sa mga pamantalaan ug iyang ngalan ang kanunay’ng gihisgutan sa mga radyo ug telebisyon.

Karon nga mibalik ko, siya lang gihapon ang gihisgutan.Unsa ba gyud diay ka isog kini si Joavan?

Apan alang kanako, ang angay basolon niini si Brod Soc nga hilabihan ka konsentedor sa gipamuhat sa iyang anak.

Tinuod nga dili tulobagon ni Brod Soc ang mga sala ni Joavan, apan nasayod ang kadaghanan nga ang iyang pag-dupadupa maoy nakaingon nga midako ang ulo nianang Joavan.

Samtang angayan natong respetohan ang amahanon nga gugma ni Brod Soc, apan dili mapugngan ang pagsaway sa publiko ngadto kaniya tungod sa iyang pagkonsenter sa binuhatan sa iyang anak nga si Joavan.

Niadtong Agosto, sa dihang nagpaingon ko sa kauluhan, si Brod Soc gi-quote sa pamantalaan samtang midupa sa kabuang sa iyang anak. Miingon siya: “ligdong ug buotan si Joavan.”

Por dios, Brod Soc, tan-awa intawon nang imong anak una ka moingon nga buotan ug ligdong.

Pagkadaghan na sa gipangbiktima anang Joavan, unya padayon gihapon kang magpaka-buta sa imong amahanong gugma ngadto sa badlongon mo nga anak.

Kay ligdong man, sa ato pa kanang imong mga konstituente nga gipangbiktima ni Joavan ang bakakon?

Pastilan!

Tingale, oras na aron mangisog si Brod Soc aron mapitol kanang iyang anak nga si Joavan.

Wala hinuon ko makasubay unsa gyud kini si Joavan ug kun nagumon ba kini sa ginadiling drugas. Kay kun mao kini ang hinungdan nga naingon siya niini, angayan siyang pugson sa pagpa-rehab.

* * *

CLEARANCE. Adunay bag-ong giduso nga balaodnon sa Kongreso karon nga kun mahimong balaod, kadtong mga sakop sa Philippine National Police ug Armed Forces of the Philippines nga magpa-promote o magpa-appoint sa taas nga posisyon sa gobiyerno pangayoan na og clearance sa Commission on Human Rights (CHR).

Ang House Bill No. 4928 gipangamahanan sa mga party-list representatives sa Bayan Muna, Anakpawis ug Gabriela.Tuyo ug tumong sa maong balaodnon, sumala pa ni Bayan Muna party-list Rep. Satur Ocampo ang paghunong sa pagpangabuso sa mga sakop sa kapolisan ug militar.

Motuo ko niini. Kining maong balaodnon magsilbe kining “deterrence” sa mga pangabuso sa mga unipormadong personnel sa gobiyerno ug magsilbe usab kining leksiyon niadtong mga maldito nga sakop sa kapolisan ug militar nga nagsalig nga dili matandog bisan sa ilang pagpanglupig sa katawhan.

Daghan na ang panghitabo nga kadtong mga gipangreklamo nga mga sakop sa kapolisan o militar manga-promote pa hinuon bisan sa mga kasong kalapasan sa gipang-atubang nga mga kasong pagpanglupig.

Ang pait pa gyud, kadtong mga heneral nga malambigit sa mga pagpanglupig, ipang-appoint sa dagkong puwesto sa gobiyerno.

Kun mahimo nang balaod kanang H.B. No. 4928, kanang mga kanahan sa kapolisan ug militar dili na ma-promote o ma-appoint og taas nga posisyon sa gobiyerno kun ang CHR dili mohatag og clearance tungod sa pending nga mga kasong kalapasan sa tawhanong katungod.

Hinuon dili nato matag-an ang panahon. Basin mag-abli usab kini og ganghaan sa korupsiyon diha sa CHR.

Dili nato mapugngan nga kanang mga dagkong isda sa AFP ug PNP mangita gyud og paagi aron lang makakuha og posisyon sa gobiyerno.

Busa, maayong lilion usab sa mga kongresista ang maong balaodnon nga gihaon sa mga party-list representatives aron mabutangan kana og mga “measures” paglikay nga mahimo lang hinuon kakuwartahan sa mga tinugyanan sa CHR.

Sa akong obserbasyon, mura’g ang CHR na lang ang nahibiling ahensiya sa gobiyerno nga maisugon pa nga nagdepensa sa katungod sa mga Pilipinong gipanglupigan sa mga unipormadong opisyal sa gobiyerno.